रचयिता
पं.श्रीव्रजकिशोरत्रिपाठी
***********************
(१. क) आवाहनम्
हे विष्णुबाले निगमादिलीले !
कुबुद्धिसंन्दोहविनाशशीले !।
आवाहयामि स्थलमत्र पुष्पैः
पूजां करोमि तव तृप्तयेहम् ।।
(ख) आसनम्
श्वेतारविन्दासनभासमाने
हृदारविन्दासनविद्यमाने !।
सिंहासने शुक्लसरोजयुक्ते
समास्व भाषे ! प्रददामि भक्त्या ।।
(ग) पादासनम्
पादारविन्दद्वयशोभनाय
ददामि पद्मं कमले ! विनम्रम् ।
संस्थापय ब्राह्मि ! सुखाय तस्मिन्
ज्ञानं समस्तं सततं प्रयच्छ ।।
(२) स्वागतम्
करोमि ते स्वागतमादिरूपे !
पुष्पाणि धृत्वा शशिकान्तिदेहे !।
आगच्छ पूजां ससुखं गृहाण
समस्तसिद्धिं कुरु बुद्धिदात्रि !।।
(३) पाद्यम्
सुशीतलं गाङ्गजलं पवित्रं
गन्धेन मिश्रं कुसुमप्रयुक्तम् ।
ददामि भाषे ! पदधावनाय
गृहाण मातः ! कुशलं ददस्व ।।
(४) अर्घ्यम्
दूर्वाक्षतैर्गन्धजलं प्रमेल्य
कृतं मयार्घ्यं तव मोदनाय ।
प्रीत्योपचारं प्रददामि तुभ्यं
गृहाण गिरां जनयित्रि ! पूतम् ।।
(५) आचमनीयम्
सुशीतलं गन्धजलं सुवासं
सम्पादितं ते मुखशोधनाय ।
प्रीत्या ददे स्वाचमनं कुरुष्व
ज्ञानामृतं मे सततं प्रयच्छ ।।
(६) मधुपर्कम्
कांस्ये सुपात्रे परमोपचारं
ददामि तुभ्यं मधुपर्कमिष्टम् ।
गृहाण सन्तोषकरं पवित्रं
सरस्वति ! त्वां प्रणमामि नित्यम् ।।
(७) पुनराचमनम्
समाहृतं तीर्थततेः सुशैत्यं
नवीनतोयं परिशुद्धमन्त्रैः ।
ददे पुनः स्वाचमनं कुरुष्व
हे वाणि ! विद्यां नितरां प्रयच्छ ।।
(८. क) पञ्चामृतस्नानम्
दुग्धेन दध्ना मधुना घृतेन
सितेन कृत्वा परमं पवित्रम् ।
पञ्चामृतं देवि ! ददामि तुभ्यं
स्नात्वा ममेष्टं सफलं कुरुष्व ।।
(ख) स्नानम्
गङ्गापयोष्णीदिननाथपुत्री-
गोदावरीपुण्यजलानि मातः !।
संगृह्य ते स्नानविधिं करोमि
भव प्रसन्ना प्रणमामि नित्यम्।।
(९.क) वस्त्रम्
सुश्वेतवर्णं रमणीयरूपं
शुभ्रांशुभं मन्त्रबलेन पूतम् ।
आच्छादनार्थं तव देहभागे
गृहाण कट्यां बहुबुद्धिदात्रि !।।
(१०) आभरणम्
मणिक्यमुक्तारजतप्रबाल-
वैडूर्ययुक्तानि मनोहराणि ।
ददामि हृद्याभरणिनि तुभ्यं
स्वाङ्गैर्मुदैतानि गृहाण मातः!।।
(११. क) गन्धः
श्वेताभगन्धं सलिलेन घृष्टं
मन्त्रेण पूतं बहुवासपूर्णम् ।
ददामि ते भालपटे दयाब्धे !
विनाशयाऽज्ञानभयं सदा मे ।।
(ख) सिन्दूरम्
उद्यद्दिवेशाभसमं सुवर्णं
सिन्दूरविन्दुं तव भालभागे ।
सीमन्तदेशे परिलेपयामि
गृहाण वागीश्वरि ! देहि बुद्धिम् ।।
(१२) पुष्पम्
श्वेताभपुष्पं तगरं च कुन्दं
मल्लिं सिताब्जं रमणीयवासम् ।
गृहाण मातः ! परिमण्डयामि
वाग्देवते ! वाग्विभवं ददस्व ।।
(१३) धूपः
वनस्पतीनां रससारवस्तु
गन्धान्वितं घ्राणसुखप्रदं च ।
संगृह्य धूपं प्रविधाय देवि !
ददे मुदा स्वीकुरु पाहि नित्यम् ।।
(१४) दीपः
ज्योतिःप्रदं मञ्जुलवर्त्तिकाढ्यं
चन्द्रार्कवैश्वानरतुल्यदीपम् ।
मुखारविन्दे परिदर्शयामि
गृहाण वीणाध्वनिशोभमाने !।।
(१५. क) नैवेद्यम्
फलानि पक्वानि सुमिष्टकानि
रम्भाफलं मञ्जुलनारिकेलम् ।
सुश्वेतलाजान् सितशर्कराढ्यान्
नैवेद्यमानन्दकरं गृहाण ।।
(ख) अन्ननैवेद्यम्
सुमिष्टमन्नं बहुव्यञ्जनाढ्यं
सुपायसं चर्वणयोग्यखाद्यम् ।
लेह्यं च पेयं रसपूर्णपूपं
हे वाणि ! भोगं ससुखं गृहाण ।।
(ग) चण्डवलिः
सखी त्वदीया सहचारिणी या
या तेऽनुषङ्गा सुखसाधनी या ।
तस्यै मुदा चण्डवलिं सुभोगाद्
ददामि भाषे ! तव तृप्तयेहम् ।।
(घ) ताम्बूलम्
रसाढ्यपत्रं खदिरेण युक्तं
चूर्णावलिप्तं जीरकादिपूर्णम् ।
गूवाकयुक्तं रमणीयरूपं
ताम्बूलमेतत् कृपया गृहाण ।।
(१६. क) वन्दनम्
हे हंसयाने सुरसेव्यमाने
मनीषिमाने समशास्त्रगाने !।
वीणातिलीने हरिनामगाने
नमामि नारायणि ! पादयुग्मे।।
(ख)आरात्रिकम्
शान्तिप्रदं वह्नियुतं शिखाढ्यं
गन्धान्वितं दीप्तिमयं गुणाढ्यम् ।
आरात्रिकं भारति ! संददामि
प्रीत्या सुखार्थं नितरां गृहाण ।।
(ग) पुष्पांजलिः
संगृह्य पुष्पाणि मनोहराणि
पुष्पाञ्जलिं तैर्विनतं ददामि ।
पूजान्तकाले तव तृप्तिहेतुं
गृहाण मातः ! सुदयां कुरुष्व ।।
इति व्यासकवि - ज्ञानज्योतिः -
कविरश्मि - ध्यानसम्राट् - पण्डित -
श्रीव्रजकिशोरत्रिपाठि - विरचिता
श्रीसरस्वतीषोडशोपचारपूजा समाप्ता।
-----------------------०--------------------
Comments
Popular posts from this blog
श्रीसूर्योपचारपूजा
January 08, 2021
Image
सूर्योपचारपूजा ************ (१. क) आवाहनम् हे सूर्यनारायण लोकबन्धो हे रक्तरूप त्रिगुणभिव्यक्त !। रक्तप्रसूनैः सुरभिप्रपूर्णैः आवाहनं ते नितरां करोमि।। (ख) आसनम् हे पद्मधारिन् जगतः सुरक्षिन् प्रकाशकारिन् जनकामदायिन्!। दिव्यं विनिन्द्यं सुरवृन्दकाम्यं सुखासनं घस्रपते ! गृहाण।। (ग) पादासनम् प्रदीप्तकान्ते कमनीयमूर्त्ते ! त्वत्पादशोभापरिवर्द्धनाय। विभिन्नकाष्ठै रचितं सुरम्यं पादासनं वस्त्रयुतं गृहाण।। (२) स्वागतम् हे दिव्यमूर्त्ते जगदेकशक्ते हे विश्वचक्षू रमणीयकान्ते !। करोमि पूजां तव तृप्तयेहं सुस्वागतं देव ! ददामि पुष्पम्।। (३) पाद्यम् आलोकदाता तिमिरप्रहन्ता समस्तलोकस्य शुभप्रदाता। गन्धान्वितं पादसुखाय तोयं ददामि पाद्यं कृपया गृहाण।। (४) अर्घ्यम् आरोग्यदाताखिलरोगहर्त्ता सुवर्णकान्त्या जनशान्तिकर्त्ता। कुशेन गन्धेन सुपुष्पयुक्तम् अर्घ्य
READ MORE
गणपतिध्यानम्
January 07, 2021
Image
श्रीगणपतिध्यानमाला-: (१) खण्डत्काण्डिरवं प्रचण्डभयदं यन्मुण्डशुण्डं मुहुः दृष्ट्वा नष्टवलिष्ठदुष्टचरितारिष्टं विनष्टं गतम्। दोर्दण्डद्वयदण्डितातिदुरितो मार्तण्डचण्डप्रभः तच्छुण्डेन विखण्ड्य दण्डमवतु ब्रह्माण्डभाण्डस्य नः।। (२) व्याघातौघस्य निघ्नो निघनधनघनो घण्टिकाघण्टकण्ठो विस्तीर्णाकारकर्णो वनवनजमनाः पापतापप्रहन्ता। दाता पाताखिलानां विजयकलयिता भद्रभावस्य भर्त्ता धीध्वान्तध्वंसदक्षो धृतिधनसुधियो रातु शं श्रीगणेशः।। (३) निघ्नः कुत्स्नभयस्य सादरमहो विघ्नप्रदोपि द्विषां मग्नश्चैव निरन्तरं श्रुतिततौ लग्नः सुखे संपदि। भग्नो येन मनोरथो निजरुचा ब्रध्नस्य तेजःपतेः नूत्नज्ञाननिधिं ददातु सदयो नग्नप्रभोर्नन्दनः॥ (४) विघ्नोत्तापविनाशनाय जलदो विघ्नासुरायान्तको विघ्नाम्भोधरवारणाय पवनो विघ्नाब्धये कुम्भभूः। विघ्नक्ष्मारुहखण्डनाय परशुर्विघ्नाग्नये वारिदो विघ्नाम्भोजविमर्दनाय रदनी तं स्तौमि विघ्नेश्वरम्।। (५) स्थूलः शान्तमना विशालजठरो यो बुद्धिदाता स्वयं यन्नामस्मरणेन यान्ति विपदः सर्वाग्रवन्द्योपि यः। विद्यादानपरायणः शुभकरः संसारदुःखापहो वन्
READ MORE
पञ्चदेवताध्यानम्
January 07, 2021
श्रीपञ्चदेववन्दनम् ( १) विघ्नेश लम्बोदर वक्रतुण्ड शैलेन्द्रपुत्रीसुत हस्तिमुण्ड !। गणेश्वर ज्ञानगणाधिनाथ निराश्रयं पाहि नमामि देव ! ।। (२) नारायण भक्तगणाधिवास वैकुण्ठवास प्रभुविश्वरूप ! । संसारसिन्धुक्षयकुम्भपुत्र निराश्रयं पाहि नमामि देव !।। (३) गौरीश सर्वेश्वर चन्द्रशीर्ष गङ्गेश शूलाहिधर महेश !। नगेशपुत्रीश्वर विश्वनाथ निराश्रयं पाहि नमामि देव ! ।। (४) दिनेश दिव्यद्युतिशोभमान तमोनिहन्तर्ग्रहराजराज ! । विश्वस्य चक्षुः कुशलं ददान निराश्रयं पाहि नमामि देव ! ।। (५) लोकत्रयाम्ब त्रिपुरारिनारि महेश्वरि त्रासविनाशकर्त्त्रि!। सुखं प्रमोदं कुशलं प्रदात्रि । निराश्रयं पाहि नमामि देवि ! ।। (६) गणेश नारायण विश्वनाथ महेश्वरि ज्योतिरधीशदेव !। न भिन्नभावं परिचिन्तयामि प्रदेहि भद्रं शरणं प्रयामि ।। इति व्यासकवि-ध्यानज्योतिः-पण्डित-श्रीव्रजकिशोरत्रिपाठि-विरचितं-श्रीपञ्चदेववन्दनं सम
READ MORE
Powered by Blogger
Report abuse
Dhyanamala
