Pre requisite for performing upanayana

🕉️

*என் மகனின் உபநயனத்தின் போது காயத்ரி மந்திர உபதேசத்தை (பிரம்மோபதேசம்) கொடுக்க நான் உண்மையில் தகுதியானவனா? தகுதி மற்றும் தீர்வைக் கண்டறிய முழுமையாகப் படியுங்கள்!*

நமஸ்காரம்

தொடர்ந்து தண்ணீர் செலுத்தாமல் இருந்தால் செடி வாடுவது போல, நமக்கு உபதேசம் என்று சொல்லப்படும் மந்திரத்தைத் திரும்பத் திரும்ப ஜபிக்காமல் இருந்தால், அது சக்தியற்று, பலனில்லாமல், பூஜ்ஜிய பலனைத் தரும். இதன் மூலம் நான் என்ன சொல்ல வருகிறேன்?

ஒரு பையனுக்கு உபநயனம் நடக்கப்போகிறது என்றும் பையனுடைய தந்தை அவனுக்கு உபதேசம் செய்யப்போகிறார் என்றும் வைத்துக்கொள்வோம். அவர் (தந்தை) தனது சிறு வயதில் தனது சொந்த உபநயனத்திற்கு பிறகு, சாஸ்திரங்களில் கூறப்பட்டுள்ள முறையான முறைகளில் சந்தியாவந்தனம் மற்றும் காயத்ரி மந்திர ஜபம் செய்ததில்லை என்று வைத்துக்கொள்வோம். இதனால் காயத்ரி மந்திரோபதேசத்தை மகனுக்குக் கொடுக்கும் தகுதியை இழக்கிறார். எப்படி சார்ஜ் ஆகாத பேட்டரிக்கு முதன் முதலாக சார்ஜ் செய்த பிறகு அதனால் மின்னோட்டத்தை/கரன்ட் அனுப்ப முடியாதோ, அதே போல சிறுவயதில் உபநயனத்தின் போது உபதேசமாக எடுத்துக் கொள்ளப்படும் மந்திரத்தை தொடர்ந்து ஜபிக்காமல் இருந்தால் சக்தியற்றதாகிவிடும். அப்படியானால் எந்த அதிகாரமும்/தகுதியும் இல்லாத தந்தை எப்படி தன் மகனுக்கு உபதேசத்தைக் கொடுக்க முடியும்?

வேத ரிஷிகள் மிகவும் கருணை உடையவர்கள். மேற்கூறியவற்றை உணர்ந்து இது போன்று வாழ்க்கையில் உள்ள ஒவ்வொரு பிரச்சனைகளுக்கும் தீர்வுகளை முன்மொழிந்துள்ளனர்.

காயத்ரி மந்திரத்தின் விதை உங்கள் உபநயனத்தின் போது உங்கள் காதில் பிரம்மோபதேசம் (காயத்ரி உபதேசம்) மூலம் விதைக்கப்படுகிறது (இது ஒரு இரகசிய மந்திரம், எனவே இது காதில் மட்டுமே ஒலிக்கப்படுகிறது). துரதிர்ஷ்டவசமாக இன்று பல பேரும் மூலை முடுக்கிலும் இந்த மந்திரத்தை தாங்கள் விரும்பும் வழியில் ஒலிக்கிறார்கள். இது சாஸ்திரங்களுக்கு முற்றிலும் எதிரானது. ஒருவர் பல வருடங்களாக சந்தியாவந்தனம் மற்றும் காயத்ரி ஜபம் ஆகியவற்றை தினமும் செய்யாதிருந்தால் காயத்ரி மந்திரம் எனும் விதை செயலற்றதாகிவிடும், ஆனால் அழிந்திருக்காது. காயத்ரி மந்திரத்தை நம் விருப்பப்படி எங்கும், எந்த இடத்திலும், பேருந்து / ரயில் / நடைபயிற்சி போன்றவற்றில் ஜபிக்க முடியாது. நமது ரிஷிகள் குறிப்பிட்டது போல், ஜபிப்பதற்கு அதன் சொந்த விதிகள் மற்றும் விதிமுறைகள் உள்ளன.

*மேலே குறிப்பிட்டுள்ள பிரச்சனைக்கான தீர்வுகள் பின்வருமாறு:*

1. உங்கள் மகனின் உபநயன தேதிக்கு முடிந்தவரை பல மாதங்கள்/நாட்கள் முன்னதாக சந்தியாவந்தனம் / காயத்ரி ஜபம் செய்யத்தொடங்குங்கள். அப்பொழுதுதான் உங்களுக்குள் மந்திரத்தின் சக்தி அதிகரித்து, அதை உங்கள் மகனுக்கு அளிக்க முடியும். நமது ரிஷிகள் மூலம் கொடுக்கப்பட்ட காயத்ரி ஜபம் மற்றும் சந்தியாவந்தன விதிமுறைகளை விடாமுயற்சியுடன் பின்பற்றுங்கள். உங்கள் மகனின் உபநயனத்திற்கு சில பல மாதங்கள்/நாட்களுக்கு முன்பே, முதலில் இருவேளை காலையிலும் மாலையிலும் செய்யத்தொடங்கி பின்பு முக்காலமும் செய்யுங்கள். உங்கள் மகனுக்கு மந்திரோபதேசத்தைக் கொடுப்பதற்கும், உங்களுக்குள் இருக்கும் மந்திரத்தின் விதையை செயலற்ற நிலையில் இருந்து மீண்டும் உயிர்ப்பிப்பதற்கும், காயத்ரி மந்திரத்தின் சக்தியை உங்களுக்குள் ஏற்றிக்கொள்ளுங்கள்.

2. மகனின் உபநயனத்திற்கு முன் தந்தை, தனது பிரம்மோபதேச யோக்யத சித்திக்கு ( *காயத்ரி உபதேச யோக்யத சித்தி* ) *குறைந்தது 12,000 காயத்ரி ஜபம் செய்ய வேண்டும்* என்று தர்ம சாஸ்திரம் குறிப்பிடுகிறது. இந்த 12,000 ஜபங்கள், அவர் சந்தியாவந்தனத்தின் போது செய்ததற்குள் அடங்காமல் கூடுதலாக ஜபிக்க வேண்டும். இந்த 12,000 ஜபங்களை சில நாட்கள்/மாதங்கள் முன்பிலிருந்து தொடங்கி பகுதிகளாக செய்யலாம். காயத்ரி உபதேச யோக்யதா சித்திக்கான ஒரு சிறப்பு சங்கல்பத்துடன் சந்தியாவந்தனம் செய்த பிறகு இந்த கூடுதல் ஜபங்களை ஜபிக்க வேண்டும்.(இதில் ஏதேனும் ஆலோசனை தேவைப்பட்டால் எங்களை தொடர்பு கொள்ளவும்). இதை சீக்கிரமாக அதாவது உபநயனத்திற்கு சில மாதங்களுக்கு முன் தொடங்கினால், அது உங்களுக்கு எளிதாக இருக்கும். மேலும், காயத்ரி மந்திரத்தில் 24 எழுத்துக்கள் இருப்பதால், இந்த சிறப்பு கூடுதல் காயத்ரி ஜபத்தை 24,000 ஆக அதிகரித்து ஜபிக்க முடிந்தால் நல்லது. குறிப்பாக வாழ்க்கையில் முறையாக சந்தியாவந்தனம் செய்யாதவர்கள் 12000 அல்லாமல் 24000 ஜபங்கள் செய்தால் அதிக புண்ணியங்கள் உண்டாகும். சாஸ்திரங்களின்படி குறைந்தபட்சம் 12000 கூடுதல் காயத்ரி ஜபம் கட்டாயம் செய்யப்பட வேண்டும்.

3. உபநயனத்திற்கு முன், தந்தை மற்றும் மகன் இருவரும் " *கிரிச்சரம்* " எனப்படும் வழிமுறையை செய்ய அறிவுறுத்தப்படுகிறார்கள், இது ஒரு வகையான "ப்ராயச்சித்தம்" (பரிகாரம்) ஆகும். இந்த முறை மகனுக்கு சற்று கடினம் ஆகையால் தந்தை செய்ய முயற்சிக்க வேண்டும். இந்த கடுமையான கிரிச்சர முறைக்கு பதிலாக (பிரத்யமணாயம்- ஆக) மகனின் உபநயனத்திற்கு முன், ஒரு வேத பிராமணருக்கு கோ-தானம் (பசு தானம்) மற்றும் பிராமண போஜனம் (வேத பிராமணர்களுக்கு உணவளித்தல்) போன்றவற்றைச் செய்யலாம் என தர்ம சாஸ்திரம் அறிவுறுத்துகிறது.

4. *நினைவில் கொள்ளுங்கள் - உங்கள் மகனின் உபநயனத்திற்குப் பிறகு, நீங்கள் சந்தியாவந்தனம் செய்யாவிட்டால், அவன் சந்தியாவந்தனம் செய்ய மாட்டான். நீங்கள் உங்கள் மகனுக்கு ஒரு முன்மாதிரியாக இருக்க வேண்டும், மற்றும் நித்யகர்மாவின் சிறப்புகளை (பிராமணர்களின் தினசரி கடமைகளை) மகனுக்கு கற்றுக் கொடுக்க வேண்டும்.* அதற்குப் பதிலாக அதைத் தவிர்க்கவும் அல்லது மகன் மட்டுமே செய்ய வேண்டும் என்று எதிர்பார்க்கக்கூடாது *ஒரு பெற்றோராக, உபநயனத்திற்குப் பிறகு நம் குழந்தைகளிடம் கண்டிப்பாக இருக்க வேண்டும் மற்றும் நித்யகர்மாவில் எந்த சமரசத்தையும் அனுமதிக்கக்கூடாது. உங்கள் மகன் சிறுவயதில் அதன் முக்கியத்துவத்தை உணர மாட்டான். ஆனால் அவன் வளர்ந்தவுடன் சந்தியாவந்தனம் மற்றும் காயத்ரி ஜபம் செய்ய வைத்ததற்கு நன்றி சொல்வான். முறையாக ஜபம் செய்துகொண்டு இருந்தால், காயத்ரி தேவி அவரை வாழ்நாள் முழுவதும், எல்லா முயற்சிகளிலும் பாதுகாத்து, வாழ்க்கையின் ஒவ்வொரு அடியிலும் வெற்றியை அளிப்பார்.*

*சிறுவனை காயத்ரி உபதேசத்தில் துவக்கி வைக்கும் உபநயனம் போன்ற மிக மிக உயர்ந்த வேத கர்மாவை சாதாரணமாகவோ அல்லது இது மற்றொரு சடங்கு என்று நினைத்துக் கொண்டு அதை ஒரு சம்பிரதாயமாக கடந்து போகவோ கூடாது. சிறுவனின் முழு எதிர்கால வளர்ச்சி, பாதுகாப்பு மற்றும் முன்னேற்றம் ஆகியவற்றிற்கு முறையாக உபநயன கர்மா செய்வதும், பிறகு முறையாக சந்தியாவந்தனம் செய்வதும் மிக மிக முக்கியப்பங்கு வகிக்கிறது. இது தவறுவதால் தெய்வ அனுக்கிரஹம் இல்லாமல் சிறுவன் தனது வாழ்க்கையில் எதிர்காலத்தில் பல்வேறு பிரச்சனைகளால் பாதிக்கப்படுகிறான். நமது ரிஷிகளாலும் வேதங்களாலும் ஆயிரகக்கணக்கான பக்கங்களளில் கூறப்பட்டடுள்ள மிக சக்தி வாய்ந்த மந்திரத்தை உபதேசமாக இன்று பெறுகிறீர்கள் என வைத்துக்கொள்வோம். அதனை அன்றைய நாள் மாலையிலிருந்தே அல்லது மறுநாளிலிருந்தே செய்ய நிறுத்தினால் உபநயனம் மற்றும் மந்திரோபதேசத்தால் என்ன பயன்? துரதிர்ஷ்டவசமாக இன்று பலரும் காயத்ரி மந்திரம் மற்றும் அதன் பிரயோகத்தின் மதிப்பு, தங்களுக்கும் தங்கள் குடும்பத்திற்கும் என்ன அற்புதங்களைச் செய்யும் என்பதை உணரவில்லை. இவ்வாறு உணராமல் இருந்தால் உபநயனம் என்பது மற்றுமொரு விளம்பர நிகழ்ச்சியாகவும், பொதுமக்கள் மற்றும் உறவினர்களுடன் கூடும் குடும்ப கூட்டமுமாகவு மே இருக்கும், அவ்வளவுதான்.*

வேத கோஷம் தற்போதைய உலகில் மிகவும் சாதாரணமாக எடுத்துக் கொள்ளப்படும் மிக முக்கியமான தர்ம சாஸ்திர விதிகளை மக்களுக்கு கற்பிப்பதை நோக்கமாகக் கொண்டுள்ளது. இதை உணராததால் மக்கள் தாங்கள் துன்பப்படும்போது, பிரச்சனையிலிருந்து விடுபட பல்வேறு வழிகளில் அடைக்கலம் தேடி, தங்கள் பிரச்சனையில் இருந்து விடுபட பரிகாரம் தேடி பெரும் தொகையை செலவிடுகிறார்கள்.

வேத கோஷம் வேதம் மற்றும் நித்யகர்மானுஷ்டானம் பற்றிய தொடர் வகுப்புகளை நடத்துகிறது. உபநயன மந்திரார்த்தம் (மந்திரங்களின் பொருள்) பற்றிய வகுப்புகளையும் நடத்துகிறது. மேலும் தந்தைகள் தங்கள் மகனின் உபநயனம் செய்ய சரியான வழியில் வழிகாட்டுகிறோம். உங்களுக்கு ஏதேனும் விபரம் அல்லது உதவி தேவைப்பட்டால் vedaghosham@gmail.com- இல் எங்களைத் தொடர்பு கொள்ளவும்

நமஸ்காரம்

🕉️