Valmiki Ramayana part 44 in Tamil

🍅 ஆதிகாவியம் இராமாயணம் 🍅

🍁 வால்மீகி ராமாயணம் 🍁 - சோ - பாகம்-44.

🌺 அத்தியாயம்-1       

🔥 ஸுமந்திரரின் கோபம் 🔥

 🍒 வசிஷ்டரின் மகனாகிய ஸுயக்ஞர், மேலும் பல அந்தணர்கள், செல்வந்தர்கள் அல்லாதவர்கள், ஊழியர்கள் போன்றவர்களுக்கெல்லாம் பெரும் செல்வங்களை ராமர் வாரி வழங்கினார். கௌஸல்யையின் புரோகிதருக்கும், தேரோட்டிக்கும் பெரும் செல்வங்களை அளித்தார். வசதி இல்லாதவர்களுக்கெல்லாம், தான தர்மங்களைச் செய்தார்.

🍒 இந்தநேரத்தில் த்ரிஜடர் என்ற அந்தணர் ராமரை வந்து அணுகினார். பெரும் வறுமையில் வாடிய அவர், தன் மனைவியினால் உந்தப் பட்டு, ராமரிடம் யாசகம் கேட்பதற்காக வந்தார். இடுப்பில் கிழிந்து போன ஒரு துணி மட்டுமே அணிந்து, ராமரின் அரண்மனைக்கு வந்த அவருடைய முகத்தில் வீசிய ஒளியைப் பார்த்து, காவலர்கள் அவருக்கு வழி விட்டனர். ராமரை அணுகி அவர் எனக்குப் பல குழந்தைகள் இருக்கின்றன. என்னுடைய வறுமையினால் அவை வாடுகின்றன. நிகரற்ற வீரனே! என் மீது கருணை காட்டு" என்று கேட்டுக் கொண்டார்.

🍒 ராமர், சிரித்துக் கொண்டே, ஆயிரக்கணக்கான பசுக்கள் இங்கே இருக்கின்றன. உங்களை கையில் வைத்திருக்கும் கழியை உங்களால் முடிந்த மட்டும் பலமாகத் தூக்கிஎறியுங்கள். அது எத்தனை பசுக்களைத் தாண்டி விழுகிறதோ, அத்தனைப் பசுக்களும் உமக்கே சொந்தம் " என்றார்.

🍒 இதைக்கேட்டு அந்த ஏழை அந்தணர், இடுப்பில் இருந்த துணியை வரிந்து கட்டிக் கொண்டு, பெரும் ஆர்வத்துடன் கழியைத் தூக்கி எறிந்தார். அந்தக் கழி சரயு நதிக் கரையை த் தாண்டி, பல்லாயிரக்கணக்கான பசுக்களைக் கடந்து, ஒரு காளையின் அருகே விழுந்தது. அத்தனைப் பசுக்களையும் த்ரிஜடரின் ஆச்ரமத்திற்கு ஓட்டிச் செல்லுமாறு கட்டளையிட்ட ராமர், அவரைக் கட்டி அணைத்துக் கொண்ட, உங்களைக் கழியை த் தூக்கி எறியுமாறு நான் சொன்னதை நீங்கள் தவறாக எடுத்துக் கொண்டு விட வேண்டாம். விரதங்களின் மேன்மையால் நீங்கள் அடைந்திருக்கும் பலம் எத்தகையது என்பதை எல்லோரும் உணர்வதற்காகத் தான், உங்களுக்கு இந்தப் பரீட்சையை நான் வைத்தேன். உங்களுக்கு வேறு என்ன தேவையோ அதையும் பெற்றுச் செல்லுங்கள். தயக்கம் வேண்டாம்" என்று கேட்டுக் கொண்டார்.

🍒 த்ரிஜடர் பெரும் மகிழ்வு கொண்டவராக, ராமருக்குப் புகழ் பலம், அன்பு, இன்பம் எல்லாம் பெருக வேண்டும்" என ஆசீர்வதித்து விடை பெற்றார்.

 தேவை இருந்த ஒரு மனிதன், தான் திருப்தியடைகிற அளவுக்குத் தானத்தைப் பெற்றுச் செல்லவில்லை"- என்று கூற முடியாதபடி தான, தர்மங்களை ராமர் செய்து முடித்து, ஸீதையும்லக்ஷ்மணனும் பின் தொடர தசரத மன்னரைக் காணப் புறப்பட்டார்.o

🍒 இவர்கள் மூவரும் நடந்து செல்லும் காட்சியைப் பெரும் துக்கத்தோடு மக்கள் கூட்டம் பார்த்தது. தெருவில் நிற்க இடம் கிடைக்காதவர்கள், ஏழு மாடிக் கட்டிடங்களின் உப்பரிகைகளில் நின்று கொண்டு, இந்தக் காட்சியைப் பார்த்தனர். அந்த மக்கள் கூட்டத்தில் பலர், காலாட் படை, குதிரைப் படை, யானைப் படை, ரதங்கள்- ஆகியவை பின் தொடர பவனி வந்த ராமர், இப்பொழுது ஒரு பாதுகாவலன் கூட இல்லாமல் ஸீதையும், லக்ஷ்மணனும் மட்டுமே பின் தொடர நடந்து செல்கின்ற இந்தக் காட்சியைக் காண சகிக்கவில்லை. தந்தை சொல்லை மீறுவதில்லை என்ற நற்குணம் பொருந்திய காரணத்தினால், அரசின் சிறப்புகளையெல்லாம் உதறி எறிந்து செல்கிறார்அவர்! 

 🍒 இது வரை தேவதைகளும் பார்க்க அஞ்சிய ஸீதை, இப்பொழுது எல்லா மக்களும் பார்க்கும் வகையில் தெருவில் நடந்து செல்கிறாள்! சந்தனக் குழம்பினால் மட்டுமே தொடத் தகுந்த அவளுடைய மேனி, இனி வெயிலிலும் மழையிலும் கிடந்து வாடப்போகிறது. தன்னுடைய மேன்மையான மகனைக் காட்டுக்கு அனுப்ப நிச்சயித்த தசரதரை, ஏதோ துர்தேவதைகள் பீடித்திருக்க வேண்டும். இல்லாவிடில் இப்படி ஒரு காரியத்தை ஒரு மனிதன் செய்வானா? நற்குணமே இல்லாத மகனைக் கூட ஒரு தந்தை இப்படித் துரத்த மாட்டான். அப்படியிருக்க , கருணை, தயை, கல்வி, இந்திரியங்களை வென்றதன்மை, சாந்தம்- ஆகிய நற்குணங்களுக்கெல்லாம் இருப்பிடமாகிய ராமரை, இப்படிக் காட்டுக்கு அனுப்புவதா? ராமருக்கு அளிக்கப் பட்ட இந்தத் துன்பம் இப்பொழுது உலகையே வாட்டுகிறது. ஒரு மரத்தின் வேரை வெட்டினால், மலர்களோடும், பழங்களோடும், அந்த மரமே சாய்வது போல், ராமர் பெற்ற துன்பம், மனித குலத்தையே வாட்டுகிறது. மனித குலத்தின் வேர் அவர். நம்மைப்போன்ற மற்ற மனிதர்கள் எல்லோரும் பூக்கள், பழங்கள், இலைகள்.

🍒 ஆகையினால் லக்ஷ்மணன், செய்வது போல நாமும் ராமரைப் பின் தொடர்ந்து சென்று விடுவோம். நமது வீடுகள், தோட்டங்கள், நிலங்கள், எல்லாவற்றையும் துறந்து ராமரைப் பின் தொடர்ந்து, சென்று அவருடைய இன்ப துன்பத்தில் நாமும் பங்கு பெறுவோம். இங்கே இருப்பதைக் கைகேயி அனுபவிக்கட்டும். நம்மால் மட்டுமல்லாமல், தெய்வங்களாலும் கைவிடப் பட்ட வீடுகளையும், பொந்துகளிலிருந்து வெளியே வந்து எலிக் கூட்டங்கள் தாறுமாறாக ஓடுகிற மாளிகைகளையும், உடைந்த பாத்திரங்கள், சுத்தப் படுத்தப் படாத கூடங்கள் போன்றவற்றைக் கொண்ட பாழடைந்த இடங்களையும்- கைகேயி நன்றாக அனுபவித்து மகிழட்டும்! நம்மால் விடப் படுகிற இந்த அயோத்தி, காடாக மாறட்டும்! நம்மால் பின் தொடரப் பட்டு ராமர் அடைகின்ற காடு அழகான நகரமாக மாறட்டும்! கைகேயியும், அவளுடைய மகனும் வாழப்போகிற இந்த நகரத்தில் கொடிய விலங்குகள் உலவித் திரியட்டும்.! நாம் ராமருடன் காட்டில் மகிழ்ச்சியுடன் வாழ்வோம்- என்றெல்லாம் பேசிக் கொண்டார்கள்.

 🍒 மக்கள் பேசிய இந்தப்பேச்சுகள் எல்லாம் ராமர் காதில் விழுந்தாலும், அவரிடம் ஒரு துளி சலனமும் ஏற்படவில்லை. யானையின் நடை போன்ற கம்பீரமான நடை நடந்து, தந்தையைக் காண்பதற்காக கைகேயியின் மாளிகையை அவர் அடைந்தார்.

 அங்கே ஸுமந்திரரைக் கண்ட ராமர், தான் வந்திருக்கும் செய்தியைத் தன்னுடைய தந்தைக்குத் தெரிவிக்குமாறு அவரிடம் கேட்டுக் கொண்டார். கிரஹணத்தினால் பீடிக்கப் பட்ட சூரியன்போலவும், சாம்பலினால் மூடப் பட்ட தீ போலவும், தண்ணீர் இல்லாமல் வறண்டு விட்ட நீர்நிலை போலவும். காட்சியளித்த தசரத மன்னரை அணுகி ஸுமந்திரர் ராமரின் வருகையை அறிவித்தார். " தான தர்மங்களைச் செய்து முடித்து விட்ட உமது மேன்மைக்குரிய மகன், வாயிலில் வந்து காத்திருக்கிறார். சூரியனைக் சுற்றி கிரணங்கள் இருப்பது போல், நற்குணங்களால் சூழப்பட்ட ராமர், காட்டுக்குச் செல்வதற்கு முன்பு உங்களைக் காண விரும்புகிறார்.

🍒 தசரத மன்னர், தன்னுடைய மனைவிகளையும்அங்கே அழைத்து வருமாறு ஸுமந்திரரிடம் கூறிவிட்டு, ராமரையும் அழைத்துவரச் சொன்னார். மனைவிமார்கள் வந்து சேர்ந்த பிறகு தன்னைக் காண்பதற்காக கூப்பிய கரங்களுடன் வருகிற ராமரைப் பார்த்தவுடன் தசரதர், தன்னுடைய இருக்கையில் இருந்து எழுந்து ராமரை நோக்கி ஓடினார். ஆனால், ராமரை அடைவதற்கு முன் பாகவே துக்கம் தாள முடியாமல், தரையில் விழுந்தார். ராமரும், லக்ஷ்மணனும் அவரைத் தூக்கி அமர்த்தினார்கள். அரண்மனை முழுவதிலும் பெண்களின் " ராமா ராமா" என்ற கூக்குரல் கலந்த அழுகை ஒலித்தது.

🍒 ஆசனத்தில் அமர்த்தப் பட்ட தசரதரைப் பார்த்து, ராமர் பேசத் தொடங்கினார். எங்கள் அனைவருக்கும் எஜமானராகி மன்னரே! நான் விடை பெறுகிறேன். என்னை ஆசீர்வதிக்கக்கோருகிறேன்.அதே போல, லக்ஷ்மணனுக்கும், ஸீதைக்கும் ஆசி கூறி அவர்களுக்கும் விடை அளியுங்கள். நான் எவ்வளவோ தடுத்தும் கூட, அவர்கள் என்னுடன் காட்டுக்கு வரத் தீர்மானித்து விட்டார்கள். தவ வாழ்க்கையை மேற்கொள்ள விரும்பிய தன் மகன்களுக்கு பிரம்ம தேவன் விடை கொடுத்து அனுப்பியது போல், எங்கள் மூவரையும் வாழ்த்தி அனுப்பி வையுங்கள்.

🌺 வைத்த கண் வாங்காமல் ராமரையே பார்த்துக் கொண்டிருந்த தசரதர், கைகேயிக்குக் கொடுத்த இரண்டு வரங்களினால் என்னுடைய சுதந்திரத்தை நான் இழந்தேன். ரகு வம்ச திலகமே, ராமா! என்னைச் சிறையெடுத்து இந்த ராஜ்யத்தைக் கைப்பற்றி மன்னனாக முடி சூட்டிக் கொள்! என்று கூறி கதறினார்.

🍒 ராமர், இன்னும் ஆயிரம் ஆண்டு காலம் நீங்களே அரசராக இருந்து ஆட்சி புரிய வேண்டும். எனக்கு ராஜ்யத்தின் மீது ஆசை இல்லை. பதினான்கு வருட காலம் காட்டில் வாழ்ந்து, உங்களுடைய வார்த்தையையும், என்னுடைய பிரதிக்ஞையையும் நான் காப்பாற்றுவதற்கு , நீங்கள் அனுமதி தர வேண்டும் என்று உங்கள் காலைப் பிடித்துக் கொண்டு கேட்கிறேன்" என்று பணிவுடன் கூறினார்.

🍒 இந்த நிலையிலும் கூட கைகேயியினால் மீண்டும் மீண்டும் வற்புறுத்தப் பட்ட தசரதர், ராமருக்கு விடை கொடுக்கிறவகையில் பேசத் தொடங்கினார். சலனமில்லாத மனதுடன் சென்றுவா! உன்னை மீண்டும் அயோத்திக்கு மகிழ்ச்சியுடன் கொண்டு வந்து சேர்க்கிற வகையில் உன்னுடைய பயணம் மங்களகரமானதாக அமையட்டும். சத்தியம் தவறாத நீ, உன்னுடைய முடிவை மாற்றிக் கொள்ளப்போவதில்லை. ஆனால்  

🍒 நீ இன்றைய தினமே புறப்பட்டுவிடாதே. இன்றைய இரவை மட்டுமாவது என்னுடன் சேர்ந்து கழிப்பாயாக. இன்னும் ஒரே ஒரு நாளாவது உன்னைப் பார்த்துக் கொண்டு நான் மகிழ்ச்சியோடு இருந்து விடுகிறேன். அடுத்த நாள் காலையில் நீ போய் விடலாம். என்னுடைய திருப்திக்காக நீகாட்டுக்குப்போவதாக நினைத்து விடாதே. சத்தியமாகச் சொல்கிறேன்- நீ காடு போவதில் எனக்குத் துளியும் விருப்பமில்லை. நிறு பூத்த நெருப்பு போல் இருந்து வந்த கைகேயினால் விளைந்த வினை இது. என்னுடைய வார்த்தையைக் காப்பாற்றுவதற்காக நீ இந்தக் கொடுமையை ஏற்பது என் மனதைப் பெரிதும் வாட்டுகிறது.

🍒 ராமர்சொன்னார், இன்றைய தினம் இங்கு தங்கி இன்பம் அனுபவித்து விட்டால், நாளைய தினம் இந்த இன்பத்தை எங்கே காண்பது? எல்லாவற்றையும் துறந்து இன்றே நான் போவது தான் முறையாகும். நான் உடனடியாகக் காட்டுக்குச் சென்றால் தான், கைகேயி தேவியார் உங்களிடமிருந்து பெற்ற வரம் காப்பாற்றப் பட்டதாகும். அது தான் உங்கள் பெருமைக்கு உகந்தது. அரசுரிமை, சுகமான வாழ்க்கை, மனதிற்கு உகந்ததை அனுபவிப்பது- போன்றவற்றை விட உங்கள் வார்த்தையை மெய்ப்பிப்பதே எனக்குப் பெரும் திருப்தி தரும். உங்கள் துன்பத்தை அகற்றுங்கள். கண்ணீர் சிந்தாதீர்கள்." காட்டுக்குப்போ" என்பது கைகேயி தேவியார் இட்ட ஆணை, போய்க் கொண்டே இருக்கிறேன்" என்பது நான் உரைத்த பதில். என் வார்த்தையை நான் காப்பாற்ற வழி செய்யுங்கள். காட்டு வாழ்க்கையை ஒரு கஷ்டமும் இல்லாமல் நான் முடித்து விடுவேன். நீங்கள் சம்பாதித்த நற்பெருமையின் மீது ஆணை! உங்கள் மூலம் நான் பெற்றுள்ள சிறப்பின் மீது ஆணை! உங்கள் வார்த்தை பொய்யாகப்போவதில்லை! நான் இப்போதே காடு செல்கிறேன். பரதன் இந்த நாட்டை ஆளட்டும். உங்கள் துன்பம் அகலட்டும். உங்கள் மனம் நிம்மதியை எய்தட்டும்.

🍒 இப்படி ராமர் பேசியவுடன் அவரைக் கட்டியணைத்த தசரதர், மூர்ச்சித்து விழுந்து உயிரற்ற சடலம் போல ஆனால். கைகேயியைத் தவிர, சுற்றி இருந்தவர்கள் அனைவரும்கதறி அழுதார்கள்.  

🔥 இந்தக் காட்சியைப் பார்த்தார் தசரதரின்தேரோட்டியும், மந்திரியுமான ஸுமந்திரர். கட்டுக்கடங்காத கோபம் அவரை ஆட்கொண்டது.ஒரு கையால் மற்றொரு கையை அழுத்தி முறுக்கினார். பல்லைக்கடித்தார்.ஓங்கி தலையில் அடித்துக் கொண்டார். கண்கள் சிவக்க, துயரம் பொங்கிவழிய, அம்புகளால் துளைப்பது போன்ற வார்த்தைகளைக்கைகேயியைப் பார்த்துப்பேசினார்.தேவி! செய்யத் தகாத காரியம் என்று ஒன்றுமே உங்களுக்குக் கிடையாதுபோல் இருக்கிறது. இந்தப் பூமிக்கே அதிபதியும், உங்களுக்குக் கணவருமாகிய தசரதரையே விட்டொழித்து விட முனைந்து விட்டீர்கள். கணவரின் உயிரைப் பறிப்பவராக உங்களை நான் பார்க்கிறேன். குலத்தையே வேரோடு நாசம் செய்பவராக உங்களை நான் காண்கிறேன். மலை போல அசையாது நிற்பவரும், கடல் போல் மகத்தானவரும், இந்திரனாலும் வெல்ல முடியாதவருமான தசரத மன்னரை நீங்கள் துன்புறுத்தியுள்ள செயல் மிகக் கொடுமையானது.

🔥 ஸுமந்திரர் மேலும் தொடர்ந்தார், மூத்த மகனே அரசுரிமை பெறுவான் என்றவழக்கத்தையே மாற்ற முனைந்து விட்டீர்! உமது ஆசைப்படியே நடக்கட்டும். பரதனே நாடாளட்டும். நாங்கள் அனைவரும் ராமன்போகும் இடத்திற்குச் செல்கிறோம். நீங்கள் ஆளப்போகும் இந்த நாட்டில் ஒரு அந்தணன் வாழ மாட்டான். ஒரு நல்லவன் வசிக்க மாட்டான். நல்லவர்களும், நாணயமானவர்களும் துறந்து விட்ட இந்த நாட்டை உங்கள் மகன் மூலம் ஆட்சி புரிவதால், என்ன பெருமையைக் காணப் போகிறீர்கள்? இப்படி ஒரு சதிகாரச் செயலை நீங்கள் செய்தும் கூட, இந்த பூமி பிளந்து நாசமாகி விட வில்லையே? என்ன விந்தை இது! மாமரத்தை வெட்டிச் சாய்த்து விட்டு, அதற்குப் பதிலாக ஒரு வேப்பமரத்தைப் பாலூற்றி வளர்த்தால், என்ன பயன்? வேப்ப மரத்திலிருந்து தேன் ஒழுகாது என்று ஒரு பழமொழிகூறுகிறது. உங்கள் குணம் அதே போல, வியப்பதற்குரியது அல்ல. உங்கள் தாயார் எப்படியோ அப்படித் தானே நீங்களும் இருக்க முடியும்! உங்கள் தாயாரின் குணத்தைப் பற்றி நாங்கள் அனைவரும் கேட்டு அறிந்திருக்கிறோம்" இவ்வாறு பேசிய ஸுமந்திரர் , கேகய மன்னனின் மனைவி யாகிய, கைகேயியின் தாயார் பற்றிய ஒரு வரலாற்றை விவரிக்கத் தொடங்கினார்.

 🍒 உங்கள் தந்தை க்கு ஒரு புண்ணிய சீலர் ஒரு வரத்தை அளித்திருந்தார். எல்லா பிராணிகளும் பேசுவதைப் புரிந்து கொள்ளக் கூடிய த் திறன் அந்த வரத்தினால் உங்கள் தந்தைக்குக் கிட்டியது. ஒரு நாள் அவர் படுத்திருக்கும் போது, ஒரு எறும்பு பேசியதைக்கேட்டுஅவர் சிரித்தார். அதைப் பார்த்து கோபம் கொண்ட உங்கள் தாயார், சந்தேகம் கொண்டு, சிரித்த காரணத்தைச் சொல்லுமாறு கணவனைக்கேட்டார். நான் பெற்ற வரத்தின் படி இந்த ரகசியத்தை எல்லாம் நான் வெளியில் சொல்லக் கூடாது. அப்படிச் சொன்னால் அடுத்த வினாடியே எனக்கு மரணம் நேரிடும்" என்று அவர் விளக்கினார்.ஆனால் உங்கள் தாயாரோ, தன் கணவனைப் பார்த்து சற்றும் கூச்சமில்லாமல், நீர் வாழ்ந்தாலும் சரி, இறந்தாலும் சரி ! சிரித்த காரணத்தை எனக்குச் சொல்லத் தான் வேண்டும்" என்று பிடிவாதம் பிடித்து பல விதமாக மிரட்டினாள். அவளுடைய கணவராகிய கேகய மன்னர், வரம் அளித்த புண்ணிய சீலரையே அணுகி என்ன செய்வது? என்று கேட்டார். அவர், உன் மனைவி விஷம் குடித்து சாகட்டும். கத்தியால் குத்திக் கொண்டு இறக்கட்டும். ரகசியத்தை நீ வெளியிடாதே! என்று கூறினார். உங்கள் தந்தையும் இதை மனதில் கொண்டு, உங்கள் தாயைக் கைவிட்டார்! அதன் பிறகு உங்கள் தந்தையின் வாழ்க்கை சிறப்பாக அமைந்தது. இப்போது உங்கள் தாயைப்போலவே, செய்யும் காரியத்தின் பெரும் தீமைகளைப் பற்றி க் கவலை இல்லாமல், நீங்களும் செயல் படுகிறீர்கள். பிள்ளைகள் தகப்பனைக் கொள்வார்கள், பெண்கள் தாயைக் கொள்வார்கள்" என்று வழங்குகிற பழமொழி உண்மையே என்று இப்போது உணர்கிறேன்.

🍒 கைகேயியின் தாயார் சம்பந்தப் பட்ட நிகழ்ச்சியை விவரித்த ஸுமந்திரர் மேலும் சொன்னார், தந்தையை விட்டுப் பிரிந்து, ராமர் காட்டுக்குச் சென்றால் உங்களுக்கு என்றும் அழியாத அவப் பெயர் உண்டாகும். மனக் கொதிப்பைத் துறந்து, ராமருடைய பட்டாபிஷேகத்திற்கு வழி செய்யுங்கள். இந்திரனை ஒத்த கணவனுக்குத் தீமை செய்யாதீர்கள்.

 இவ்வாறு ஸுமந்திரர் கடுமையாகப்பேசியும் கூட, கைகேயி யின் மனம் சிறிதும் கலங்கவில்லை. வெட்கத்தாலோ, பயத்தாலோ, தயக்கத்தாலோ கூட, அவளுடைய முகம் பாதிக்கப் படவில்லை. 

🍒ஜயராம் ஜயராம் ஜயராம் ஜயராம் ஜயராம். 

ஸ்ரீவைஷ்னவிசம் முகநூலிலிருந்து எடுத்தது