sumukha pancakam - Sanskrit poem

।। सुमुखपञ्चकम् ।।

हे विघ्नराज गिरिजात्मज ईशपुत्र

स्कन्दाग्रज स्फुटितदन्त सुवक्रतुण्ड ।

हेरम्ब मङ्गलवरप्रद लोकपूज्य

मत्तेभवक्त्र सुमुख जगदीश रक्ष ।।1

हे विघ्ननाश द्विरदानन शूर्पकर्ण

लम्बोदर प्रथमपूज्य सुब्रह्मचारिन् ।

नागोपवीत नतभक्तजनार्तिहारिन्

मत्तेभवक्त्र सुमुख जगदीश रक्ष ।।2

हे सुप्रसन्न सुरनायक आखुवाह

अर्धेन्दुभूषाभयप्रद गणाधिनाथ ।

दूर्वादलार्ककुसुमार्चितपूज्यपाद

मत्तेभवक्त्र सुमुख जगदीश रक्ष ।।3

हे पञ्चहस्त प्रणवाक्षरपूर्णरूप

आनन्दचिन्मय गजानन एकदन्त ।

आशाप्रपूर अतिसुन्दर अप्रमेय

मत्तेभवक्त्र सुमुख जगदीश रक्ष ।।4

हे सिद्धिदायक सुबुद्धिद स्वप्रकाश

पाशाङ्कुशधर गुणालय मङ्गलात्मन् ।

क्षिप्रप्रसादन विनायक कीर्तिमन्त

मत्तेभवक्त्र सुमुख जगदीश रक्ष ।।5

🙏🏾 Pālāmadai Ananthasubramanian 🙏🏾