**ஸ்ரீமதே ராமாநுஜாய நமஹ... ஸ்ரீமத் வரவரமுநயே நமஹ...* 🙏🙏🙏
*தஸாவதாரம்*
*ஸ்ரீராமவதாரம்*
*பகுதி 02*
*ஸ்ரீயோக ராமர் கோயில்*
*நெடுங்குணம்* :
மனிதர்களிடையே மறைந்துள்ள ஆன்மீகத்தை வெளிப்படுத்துவதற்காக ஸ்ரீமன் நாராயணன் ராமராக அவதரித்ததாக
இலக்கிய வாயிலாக அறியமுடிகிறது. ஒரு சொல், ஒரு வில், ஒரு இல் என்று வாழ்ந்தவராக ராமர் பாவிக்கப்படுகிறார். ராமன் அழகும், நல்ல தோற்றமும் அரச அம்சங்களுடனும் பிறந்தார்.
பூமியில் அவருக்கு நிகர் எவருமில்லை. இத்தகைய இராமரின் யோகத் திருநாமத்தை வழிவடுவதால் எந்த ராசிக் காரர்களுக்கு யோகம் ஜொலிக்கும் தெரியுமா?
இவ்வுலகின் தோற்றம் மற்றும் அதன் இயக்கத்திற்கு மூலகாரணமாக திகழ்வது வேதங்களாகும். இத்தகைய வேதத்தை உருவாக்கியது யார் என்ற சந்தேகம் ஒருமுறை அனுமனுக்கு
உண்டானது. இச்சந்தேகத்தை தீர்க்கும் படி ராமனிடம் வேண்டினார் அனுமன். அப்போது, ராமரோ தனது சின்முத்திரை வலது கையை மார்பில் வைத்து அனைத்து உயிர்களுக்குள்ளும்
பரமாத்மா எனும் இறைவன் இருப்பதைப் போல நானே வேதமாகவும், வேதத்திற்குள் அதன் தத்துவமாகவும் இருக்கிறேன் என்றார். இந்த அமைப்பில் அமைந்துள்ள ஒரே தலம்
தமிழகத்தில்
திருவண்ணாமலை நகரில் இருந்து சுமார் 52 கிலோ மீட்டரிலும் சேத்பட்டிலிருந்து வந்தவாசி சாலையில் சுமார் 6 கிமீ தொலைவில் உள்ளது ஸ்ரீ யோக ராமர் திருக்கோவில். இத்தல ராமர் புஷ்பக விமானத்தின் கீழ் அமர்ந்து சின்முத்திரை காட்டிய வலது கையை மார்பில் வைத்துள்ளார். இதுபோன்ற காட்சி தென்னிந்தியாவில் வேறெங்கும் காணக்கிடைக்காத ஒன்றாகும்.
மலையே இறைவனாகத் திகழும் திருத்தலம். சைவம் வைணவம் செழித்தோங்கும் பூமி. தமிழகத்தில் தனியே ராமபிரானுக்கென அமைந்துள்ள பிரம்மாண்ட திருக்கோயில்!
சிவபெருமானிடம் ஞானம் வேண்டி சுகப்பிரம்மரிஷி தவமியற்றிய பூமி.
சிவபெருமானின் ஓலைச்சுவடியை ராமர் பெற்ற தலம்.
கிளியாறு உற்பத்தியாகும் மலையை கொண்ட தலம். செஞ்சியை ஆண்ட அச்சுதராமபத்ர நாயக்கர் எழுப்பிய கோயில். விஜயநகர மன்னர்கள் உள்ளிட்ட பலரும் திருப்பணி செய்து மகிழ்ந்த கோயில். ராமபிரானும் முருகப்பெருமானும் வீதியுலா வரும் ஊர்! நம்பியவரைக் காத்தருளும் ராமபிரான் வாழும் திருக்கோயில் என பல்வேறு சிறப்புக்கள் கொண்ட திருக்கோயிலாகத் திகழ்வது, திருவண்ணாமலை மாவட்டம் "நெடுங்குணம் ராமபிரான்' திருக்கோயில்.
பராசரர்-மச்சகந்திக்கு மகனாகப் பிறந்தவர், வேதவியாசர். வேதவியாசர்- கிருதாசி என்ற தம்பதியினருக்கு மகனாகத் தோன்றியவர் சுகப்பிரம்மரிஷி. சுகம் என்பதற்கு கிளி என்று பொருள். கிளிமுகம் கொண்டவராகத் திகழ்ந்ததால், சுகர் என்று அழைக்கப்பட்டார்.
நாரதரின் ஆலோசனைப்படி, ஞானம் பெற நெடுங்குன்றத்தில் மலையாக விளங்கும் சிவபெருமானை நோக்கித் தவம் இருந்தார். சிவபெருமான் காட்சியருளி ஞானம் தந்தார். அதோடு ஓர் ஓலைச்சுவடிக் கட்டினை அவரிடம் தந்து, "இலங்கையில் ராவண வதம் முடித்து ராமன் வரும் போது அவரிடம் தர வேண்டும்' என்று பணித்தார்.
அதன்படி, ராமபிரான் நெடுங்குணம் வந்தபோது, இச்சுவடிக்கட்டினை அவரிடம் தந்தார் சுகப்பிரம்மரிஷி. இத்தலத்தில் அமர்ந்த கோலத்தில் ராமபிரானும், சீதாப்பிராட்டியும் காட்சிதர, அருகே லட்சுமணன் நின்றிருக்க, அனுமன் சுவடிக்கட்டினைப் படித்துக் காட்டினார் என்பது வரலாறு. இந்த வரலாறே இன்று கருவறையில் காட்சியளிக்கின்றது.
தொன்மையான இத்திருக்கோயில் முகமதியர் ஆட்சியில் பல்வேறு இன்னல்களைச் சந்தித்தது. அலாவுதீன் கில்ஜி ஆட்சிக் காலத்தில் (கி.பி.1296) மாலிகாபூரின் வருகையை முன்கூட்டியே அறிந்த ஊர் பெரியவர்கள் அனைத்து சிலைகளையும் பூமிக்குள் புதைத்து வைத்தனர். அது தெரியாமல் அடுத்த தலைமுறையில் வீடு கட்ட பூமியைத் தோண்டியபோது பல்வேறு சிலைகள் கிடைத்தன. இன்னும் எத்தனையுள்ளன என்பது தொல்லியல் ஆய்வுகளும், வருங்காலமுமே பதில் கூற இயலும். சிதிலமடைந்த பழைய கோயில் இடம் மாறி, மன்னர்கள் காலத்தில் தற்போதுள்ள பிரம்மாண்ட இடத்தில் அமைக்கப்பட்டது.
இத்தலம் குறித்து செந்தமிழ்ப் பாவாணர் நெ.ப.சுந்தரேசன் எழுதிய நெடுங்குன்றம் சிவனார் போற்றித் திருப்பதிகம் மற்றும் நெடுங்குன்றம் ஸ்ரீராமன் தலவரலாற்று பதிகமும் தலவரலாற்றைக் கூறுகின்றன.
இத்தலத்து சிவபெருமானின் பெயர் தீர்க்காசலேஸ்வரர். தீர்க்கம் என்பதற்கு - நெடு என்றும், அசலம் என்பதற்கு மலை, குன்றம் என்றும் பொருள் வழங்கப்படுகின்றது. நெடுகுன்றமாக இறைவன் விளங்குவதால் இத்தலம் நெடுங்குன்றம் என வழங்கப்பட்டது. இறைவனே மலையாக வாழும் நெடுங்குன்றம் என்ற இயற்பெயர் மருவி, நெடுங்குணம் என வழங்கப்படுகின்றது.
ராமர் கோயில் எதிரே தீர்க்காசலேஸ்வரர் கோயிலும், பின்புறம் நெடுங்குன்றம் மலையும் கண்ணுக்கு விருந்தாக அமைந்துள்ளன. சுகர் தவமியற்றிய மலையான இதிலிருந்து உற்பத்தியாகும் ஆறு, கிளியாறு என்று வழங்கப்படுகிறது.
நெடுங்குணம் சாலையோரத்தில் பிரம்மாண்டமாக ராமபிரான் ஆலயமும், எதிரே தீர்க்காசலேஸ்வரர் ஆலயமும், சிவபெருமான் வாழும் மலையும் காட்சிதருகின்றன. சுமார் எண்பத்தேழாயிரம் சதுரஅடி பரப்பளவில், ஆலயம் அமைந்துள்ளது. நான்கு திசைகளிலும் ராஜ வீதிகளும் அமைந்துள்ளன.
105 அடியில் ராஜகோபுரம் நம்மை வரவேற்கிறது. கோபுர வாயிலின் புடைப்புச் சிற்பங்கள் நிறைந்து காணப்படுகின்றன. இதனைக் கடந்து பலிபீடம், கொடிமரம் அமைந்துள்ளன. வலதுபுறம் வாகன மண்டபம், தென்புறம் பதினாறுகால் ஊஞ்சல் மண்டபம், மடைப்பள்ளி கட்டடம் அமைந்துள்ளன. இதனையடுத்து 65 அடி கிளி கோபுரம் அமைந்துள்ளது. இதன் உள்புறம் கலைநயம் கொண்ட புராணத்தை வலியுறுத்தும் காட்சிகள் புடைப்புச் சிற்பங்களாக அமைந்துள்ளன. மகாமண்டபத்தின் கருவறை முன்மண்டபத்தில் குலசேகர ஆழ்வார், தொண்டரடிப் பொடியாழ்வார், பொய்கை ஆழ்வார், பேயாழ்வார், பூதத்தாழ்வார் சிலா திருமேனிகள் அமைந்துள்ளன. திருமங்கை ஆழ்வார், திருப்பாணாழ்வார் நின்ற கோலத்தஇல் காட்சி தருகின்றனர்.
அருள்மிகு யோக ராமர் கோயில், நாட்டிலேயே தனிச்சிறப்பு பெற்ற கோவில்களில் ஒன்றாகும். வேறெந்த கோவிலுக்கும் இத்தலத்திற்கான சிறப்பு இல்லை. அதாவது அமர்ந்திருக்கும்
நிலையில் அற்புதமான கலையில் கட்டப்பட்ட கோவிலாக இது உள்ளது. குறிப்பாக, இக்கோவிலை விஜயநகர பேரரசர்கள் கட்டியுள்ளதாக கூறப்படுவதால் வரலாற்று சிறப்பு வாய்ந்த தலமாகவும் இக்கோவில் உள்ளது.
*கடல் தீர்த்தவாரி*
இத்தலத்தில் பவுர்ணமி, அமாவாசை மற்றும் புனர்பூச தினங்களில் மூலவருக்கு சிறப்பு பிரார்த்தனை நடைபெறும். ஆவணி இரண்டாம் வெள்ளிக் கிழமையில் ராமர், சீதை, லட்சுமணணுக்கு
கருட சேவை காட்சி அளிக்கிறார். இத்தலத்தில் வழிபட்டு விட்டு மகாபலிபுரம் சென்று கடலில் தீர்த்தவாரி வழிபட்டால் வாழ்நாளில் தீங்கில் இருந்து மோட்சம் உண்டாகும் என பக்தர்களால்
நம்பப்படுகிறது.
*ஆழ்வார் எம்பெருமானார் ஜீயர் திருவடிகளே சரணம்* 🙏🙏🙏
*வானமாமலை ராமானுஜ ஜீயர் திருவடிகளே சரணம்* 🙏🙏🙏
நாளையும் ஸ்ரீராமாவதாரம் தொடரும் ....
🙏 *சர்வம் கிருஷ்ணார்ப்பனம்* 🙏*
No comments:
Post a Comment