Krishna Avatar 25

ஸ்ரீமதே ராமாநுஜாய நமஹ... ஸ்ரீமத் வரவரமுநயே நமஹ... 🙏🙏🙏
     
           தஸாவதாரம்

          ஸ்ரீகிருஷ்ணாவதாரம்

 பகுதி 25

 முன்னோர் தூது வானரத்தின் வாயில் மொழிந்து,அரக்கன்

 மன்னூர் தன்னை வாளியினால் மாள முனிந்து அவனே

 பின்னோர் தூதனாதிமன்னர்க் காகிப் பெருநிலத்தார்,

 இன்னார் தூத னெனநின்றா னெவ்வுள் கிடந்தானே.

 விளக்கம்

முன்
-
ஸ்ரீராமாவதாரத்திலே

வானரத்தின் வாயில்
-
(அனுமான்) திருவடி மூலமாக

ஓர் தூது மொழிந்து
-
(சீதா பிராட்டிக்குத்) தூது சொல்லியனுப்பி (பிறகு)

அரக்கன்
-
இராவணனுடைய

மன் ஊர்தன்னை
-
சிறந்த லங்காபுரியை

வாளியினால்
-
ஓர் அம்பினாலே

மாள முனிந்து
-
மாண்டுபோகும்படி சீறிமுடித்து,

பின்
-
பின் பொருகாலத்தில்

ஆதி மன்னர்க்கு
-
ராஜாதிராஜர்களான பாண்டவர்களுக்கு

ஓர் தூது ஆகி
-
விஸ்வாசமான தூதனாய்,

பெரு நிலத்தார் இன்னார் தூதன்  என நின்றானவனே
-
பெரிய இப்பூமியிலுள்ளாரெல்லாரும் இவன் இன்னாருடைய தூதன் என்று சொல்ல அதனால் நிலைபெற்று நின்ற அப்பெருமான்
திருஎவ்வுள் (திருவள்ளூர் வைத்திய வீரராகவன்)  கிடந்தான்-.      

 பாண்டவதூதன்

சஞ்சயன் தூதாக வந்து சென்றபின் தருமர் எதற்கும் துரியோதனனுக்கு மீண்டும் ஒரு வாய்ப்பு கொடுத்து பார்ப்போம் என்றார். அதற்கு கிருஷ்ணன் தயாரானார்.
ஆனால் பீமன் கொதித்து எழுந்தான் 'சமாதானம் வேண்டாம் போர்தான் வேண்டும்' என்றான். அர்ச்சுனன், நகுலன், சஹாதேவனும் சமாதான முயற்சியை விரும்பவில்லை. திரௌபதியும் அழுதவாறே துரியோதனன் சபையில் தான் பட்ட வேதனையை நினைவூட்டினாள்.
கிருஷ்ணர் அஸ்தினாபுரம் செல்லப் புறப்பட்டார். இதை அறிந்த திருதிராட்டினன் மகிழ்வது போல நடித்தான் விதுரரை அழைத்து 'தேர், யானை, குதிரை ஆகியவற்றையும் ரத்தினக் குவியல்களையும் பகவானுக்கு பரிசுப் பொருள்களாக வழங்க வேண்டுமென் நூறு புத்திரர்களும் கண்ணனை எதிர்கொண்டு அழைக்க வேண்டும். வரவேற்பு பிரமாதமாக இருக்க வேண்டும்' என்றெல்லாம் கூறினான்.

அவன் கருத்தை அறிந்த விதுரர்..'இத்தகைய ஆடம்பரங்களை கண்ணன் விரும்ப மாட்டார்' என்றான்.
அஸ்தினாபுரத்தை அடைந்த கண்ணனும் இவ் வரவேற்புகளை பொருட்படுத்தாது திருதிராட்டினன் மாளிகைக்கு செல்லாமல் விதுரரின் வீட்டிற்குச் சென்றார். அங்கிருந்த குந்தி அவரை வரவேற்றாள்.
துரியோதனன் கண்ணனை தன் மாளிகைக்கு விருந்தினராக வந்து மகிழ்விக்குமாறு வேண்டினான். ஆனால் கண்ணன் சம்மதிக்கவில்லை. காரியம் நிறைவேறுவதற்குள்..தூதுவர் பகைவர் வீட்டில் உண்பது வழக்கமில்லை என்றார். கௌரவர், பாண்டவர் இருவருக்கும் நடுநாயகமாக விளங்கும் தாங்கள் ஏன் எங்களை பகைவராய் எண்ணுகிறீர்கள்? என துரியோதனன் கேட்டான். அதற்கு கண்ணன் பாண்டவர்கள் தர்மத்தை போற்றி நடக்கிறார்கள் நீ.. அந்த தர்மவான்களை அழிக்க எண்ணுகிறாய். நான் எப்போதும் தர்மத்தின் சார்பில் இருப்பவன். தர்மத்திற்கு எதிரி எனக்கும் எதிரி அந்தவகையில் நீயும் எனக்கு பகைவன் ஆகவே உன் விருந்தை நான் ஏற்கமாட்டேன்' என்றார். விதுரரின் மனைவி கிருஷ்ணருக்கு வாழைப்பழம் கொடுப்பதற்காக தன் வீட்டிற்கு பகவான் வந்த மகிழ்ச்சியில் வாழைப்பழத்தை கீழே போட்டு தோலை தட்டில் வைக்க பகவானும் அதை சாப்பிட விதுரர் அதைப்பார்த்து மனைவியை கோபித்து  பழத்தை கிருஷ்ணருக்கு கொடுக்க, எனக்கு உன் மனைவி கொடுத்த தோலிலேயே பசி நீங்கிவிட்டது என்றார்.

துரியோதனனின் விருந்தை கண்ணன் மறுத்தாலும், அவனது அவைக்கு தூதுவராய் சென்றார்.
திருதிராட்டினனை நோக்கி துரியோதனனுக்கு அறிவுரைக் கூறி அவன் அழிவைத் தடுக்குமாறு கேட்டுக் கொண்டார். ஆனால், திருதிராட்டிரன் தன் இயலாமையைக் கூறினான். பின் கண்ணன் துரியோதனனைப் பார்த்து பேச ஆரம்பித்தார்.

"உனது தந்தையும்,மற்றும் அனைத்து சான்றோரும் நீ பாண்டவர்களுடன் சேருவதையே விரும்புகின்றனர் அதைக் கேளாத நீ பெரும் துன்பமடைவாய் பீமனையும், அர்ச்சுனனையும் வென்றாலே உனக்கு உண்மையான வெற்றி கிட்டும். ஆனால், அவர்களை வெல்ல உன் பக்கம் யாரும் இல்லை குலத்தை அழித்த பழி உனக்கு வேண்டாம். பாண்டவர்களுக்கு பாதி நாட்டைக் கொடுத்துவிட்டு அவர்களுடன் இணைந்து வாழ்வாயாக' என்றார்.
துரியோதனன் பழைய பல்லவியையே திரும்ப பாடினான். குண்டூசி அளவு நிலம் கூட தரமுடியாது என்பதில் உறுதியாய் இருந்தான். 'விதுரர், பீஷ்மர், துரோணர் ஆகியோர் எனக்கே அறிவுரை கூறுகின்றனரே. நான் பாண்டவர்க்கு அப்படி என்ன தீது செய்தேன்?' என்றான்.

'துரியோதனா, நீ செய்த தீமை ஒன்றா இரண்டா.அவர்களை வற்புறுத்தி சூதாடவைத்தாய் அவையில் திரௌபதியின் ஆடையை களைய முற்பட்டாய். வாரணாவதத்தில் தாயுடன் சேர்த்து அவர்களை எரிக்க முயன்றாய். பீமனைக் கட்டிப் போட்டதும், விஷம் கொடுத்ததும் ஆகிய கொடுமைகள் செய்தாய். இப்படி பாவங்களையே செய்த நீ என்ன தீது செய்தேன் என்கிறாய் நல்லவன் போல நடிக்கிறாய். சான்றோர் உரையையும் நீ மதிக்கவில்லை சமாதானத்தை விரும்பாத நீ போர்க்களத்தில் அழிவது உறுதி' என்றார் மாதவன்.
இதுகேட்ட துரியோதனன் கடும் சினம் கொண்டான். கண்ணனை கைதியாகப் பிடித்துச் சிறையில் வைக்க முயன்றான். அதைக் கண்டு நகைத்த கண்ணன் தன் விஸ்வரூபத்தை அனைவரும் காணச் செய்தார். அவரிடமிருந்து எல்லா தேவர்களும் மின்னல் போல் காட்சி அளித்தனர். எங்கெங்கு நோக்கினும் கண்ணன் தான். ஒரு கோடி சூரியன் உதயமாயிற்றோ என அனைவரும் திகைத்தனர். சங்கு, சக்கரம், கதை, வில், கலப்பை என எல்லாக் கருவிகளும் அவர் கரங்களில் ஒளி வீசின. பகவான் கிருஷ்ணர் கௌரவர்களை எரித்து சாம்பலாக்குவது போல பார்த்தார்.

கண்ணனை பீஷ்மர், விதுரர், துரோணர், திருதிராட்டிரன், அசுவத்தாமா, விகர்ணன் ஆகியோர் கரம் குவித்து வணங்கி வழி அனுப்பினர். கண்ணன் குந்தியைக் காணச் சென்றார். அவையில் நடந்தவற்றை அத்தையிடம் கூறினார். பிறகு கர்ணனைச் சந்தித்து அவனது பிறப்பின் ரகசியத்தைக் கூறினார். தனது பிறப்பின் ரகசியத்தை யுத்தத்திற்கு முன் வெளியிட வேண்டாம் என்றான் கர்ணன். துரியோதனனுடன் ஆன நட்பை யாரும் பிரிக்க முடியாது என்றும் உரைத்தான். பின் தாய் குந்தி தேவி கர்ணனை சந்தித்து கர்ணன் பிறந்த சூழலை உரைத்தாள். பின் தாயிடம் கர்ணன் 'அர்ச்சுனனைத் தவிர, மற்ற நால்வருடன் போரிட மாட்டேன்' என உறுதி அளித்தான். பின் தாயே! அர்ச்சுனனுடன் ஆன போரில் யாரேனும் ஒருவர் மடிவோம். அப்படி நான் மடிந்தால் என் தலையை தங்கள் மடியில் வைத்து மகனே எனக் கதறி அழுது நான் உன் புதல்வன் என்பதை உலகிற்கு உணர்த்து நான் வெற்றி பெற்றாலும், என் மூத்த மகன் வென்றான் என உண்மையைத் தெரிவி. ஆனால் எக்காரணம் கொண்டும் போருக்கு முன் என் பிறப்பின் ரகசியத்தை யாருக்கும் அறிவிக்க வேண்டாம் 'என்றான்.

பின்..கண்ணன்..தருமரை சந்தித்து..நடந்த விஷயங்களைக் கூறி யுத்தத்தை தவிர வேறு வழி இல்லை என்றார். எல்லாம் விதிப்படி நடக்கும் என்ற தருமர் போர் செல்ல தயாராயினர். பலராமர்..முன்னரே..சொன்னபடி..குருக்ஷேத்ரப் போர்க்கால அழிவைப் பார்க்க விரும்பாமல்..தீர்த்தயாத்திரைக்குப் புறப்பட்டார்.

 ஆழ்வார் எம்பெருமானார் ஜீயர் திருவடிகளே சரணம் 🙏🙏🙏

 வானமாமலை  ராமானுஜ ஜீயர் திருவடிகளே சரணம் 🙏🙏🙏

நாளையும்  ஸ்ரீகிருஷ்ணாவதாரம்   தொடரும் ....

🙏 சர்வம் கிருஷ்ணார்ப்பனம் 🙏*