Adhyatama ramayanam ayodhya kandam part 1 in tamil

Courtesy: Smt.Dr.Saroja Ramanujam

அத்யாத்ம ராமாயணம்- அயோத்யா காண்டம்

அத்தியாயம் 1
சிவபெருமான் தொடர்ந்து கூறினார்.
ஓரு சமயம் நாரதர் ராமனைக் காண வந்தார். ராமனும் சீதையும் அவரை வணங்கினர். ராமன் தன்னைப் போன்ற கிருஹஸ்தர்களுக்கு நாரதரைப் போன்ற மகான்களின் வருகை பெரும் பாக்கியம் என்றும் பூர்வஜன்ம புண்ணியம் இருந்தால் மட்டுமே கிடைக்கும் என்று கூறியதைக் கேட்ட நாரதர் சிரித்து ஒரு சாமான்ய மானுடனைப் போல் ராமன் பேசுவது தன்னை மாயைக்குட்படுத்தவா என்று கேட்டு, ஆயினும் பரப்ரும்மமாகிய அவர் மாயையின் சேர்க்கையால் உலகங்களை உண்டுபண்ணுவதால் தான் ஒரு க்ருஹஸ்தன் என்று கூறியதும் சரியே என்றார்.

மேலும் ராமன்ஸ்ரீமன் நாராயணனே என்றும் சீதையே திருமகள் என்றும், எல்லா தேவர்களின் புருஷ உருவமும் ராமனே, சீதையே பெண் பெண் சக்தி என்றும் கூறினார்.பிறகு நாரதர் ராமனை பரப்ரம்மமாகத் துதிக்கத்தொடங்கினார்

அவர் கூறிய துதியானது பின் வருமாறு.
"உருவற்ற பிரக்ருதியே மாயையில் தோன்றும் உந்தன் பிம்பம். அதிலிருந்து மஹத் அல்லது புத்தி தோன்றிற்று . அதிலிருந்து வந்தது அஹங்காரம். அது பஞ்சதன்மாத்திரையைத் தோற்றுவித்தது. இது பிரபஞ்சத்தின் ஸூக்ஷ்ம உருவம்.. (பஞ்சபூதங்கள் ஸ்தூல உருவம்)

அவைகளில் இருந்து தோன்றியவை லிங்கசரீரம் எனப்படும் அஹங்காரம், புத்தி, மனம், இந்திரியங்கள் பிராணன் இவைகளோடு கூடிய ஜீவாத்மா. இதுவே அஞ்ஞானத்தின் காரணமாக பிறப்பு இறப்பு சுக துக்கம் எனப்படுபவைகளுக்கு உட்பட்டதாகிறது.

ஸம்சாரம் என்பது விழிப்பு , கனவு, தூக்கம் என்னும் முறையே ஸ்தூல ஸூக்ஷ்ம காரண சரீரங்களின் மூலம் ஏற்படுவது. எல்லாவற்றிற்கும் ஸாக்ஷியாக அந்தராத்மாவாக நிற்பது ரகுகுல திலகனான நீயேயாகும்.

இந்த பிரபஞ்சம் உன்னால் ஸ்ருஷ்டிக்கப்பட்டு , உன்னாலேயே காக்கப்பட்டு, உன்னிடமே ஒடுங்குகிறது.

கயிறைப் பாம்பென நினைத்து ஏற்படும் பயம் அதுகயிறென அறிந்து நீங்குவதைப் போல நான் ஜீவனல்ல ஆத்மா என்று உணர்கையில் ஸம்சார பயம் நீங்குகிறது. அதற்கு அறியாமையை போக்கும் உண்மை அறிவை நாடவேண்டும். அந்த அறிவு உன் பக்தர்களிடமே காணப்படுகிறது. அதனால் பக்தியே முக்தியைக் கொடுக்கும். "

பிறகு நாரதர் 'அஹம் த்வத்பக்தபக்தானாம் தத்பக்தானாம் ச கிங்கர;' "நான் உன் பக்தர்களின் பக்தர்களின் பக்தர்களுக்கு தொண்டனாவேன் " என்று கூறி தான் பிரம்மாவின் புத்திரராகையால் பகவானின் பேரன் என்றும் அதனால் தன்னை மாயையில் இருந்து காத்தருள வேண்டும் என்றும் வேண்டினார்.

.அதன்பின் நாரதர் தன்னை ராமனிடம் அவனுடைய அவதார காரியத்தை நினைவூட்ட பிரம்மா அனுப்பியதாகக் கூறினார். அதனால் ராமன் மறுநாள் அவன் தந்தையால் அளிக்கப்போகும் ராஜ்ஜியத்தை ஏற்கக் கூடாது என்று நாரதர் கூறியதைக் கேட்ட ராமன் புன்சிரிப்புடன் அது தனக்கும் தெரியும் என்றும் தக்க சமயத்தில் ராவண வதம் நடைபெறும் என்றும் தான் சீக்கிரமே சீதையுடன் வனம் செல்லப்போவதாகவும் கூறினார்.

அதைக்கேட்ட நாரதர் ராமனை வணங்கி விடைபெற்றார்.
இதைக்கூறிய சிவ பெருமான் , இந்த சம்பாஷணையை படிப்பவரும் நினைவில் கொள்பவரும் எளிதாகத் துறவு பூண்டு முக்தி அடைவர் என்றார்.