Vishnu Sahasranama 522 to 535 in tamil

Courtesy:Smt.Dr.Saroja Ramanujam

விஷ்ணு ஸஹஸ்ர நாமம்

522. அம்போநிதி: -அம்பஸாம் நிதி: அம்பு என்றால் நீர். நிதி: என்றால் இருப்பிடம். ஆதலால் இந்தச் சொல் கடலைக் குறிக்கிறது.பகவானை அம்போநிதி என்று குறிப்பிடுவதன் காரணம் மூன்று. 
1. கீதையில் பகவான் 'ஸரஸாம் அஸ்மி ஸாகர:' "நீர்நிலைகளுள் கடலாக இருக்கிறேன் என்கிறான். 
2, பாற்கடலில் கூர்மமாக தன்னை வைத்தான் , அம்பஸி நீயதே இதி அம்பஸாம் நிதி: தண்ணீரில் வைக்கப்பட்டது. 
3. அம்பஸ் என்ற சொல் தேவர்களையும் குறிக்கும். அவர்களுக்கு நிதி போன்றவன், அல்லது அவர்கள் அவனிடம் வைக்கப்பட்டிருக்கிறார்கள்.

523. அனந்தாத்மா- அனந்த என்றால் ஆதிசேஷன் என்றும் எண்ணற்ற என்றும் பொருள். பகவான் ஆதிசேஷனுக்கு ஆத்மாவானவன். அனைத்துயிர்களுக்கும் அந்தராத்மாவாக இருக்கிறான்.

524.மஹோததிசய: -மஹோததி என்பது பாற்கடலைக் குறிக்கிறது. மஹோத்திசய என்றால் அதன் மேல் பள்ளிகொள்பவன் என்று பொருள். அல்லது பிரளயகாலத்தில் ஆலிலை மேல் துயில்கின்றதையும் குறிப்பதாகக் கொள்ளலாம்

525. அந்தக:- அந்தம் கரோதி இதி அந்தக: - ஸம்ஹரிப்பவன் என்று பொருள். கீதையில் 'காலோ அஸ்மி லோகக்ஷயக்ருத் ப்ரவ்ருத்த: ,' "உலகங்களை அழிக்கும் காலன் நான்" என்கிறார்.

526.அஜ:-- அகாரத்தின் பொருள் நாராயணன். (அக்ஷராணாம் அகாரோ அஸ்மி – எழுத்துக்களில் நான் ஆகாரமாக இருக்கிறேன்.- கீதை) ஜ: என்றால் அகாரமாகிய நாராயணனிடம் ஜனித்த மன்மதனின் மறுஜன்மமாகிய பிரத்யும்னன். அதாவது பகவானுடைய வ்யூஹ ரூபமாகிய பிரத்யும்னனைக் குறிக்கிறது.,

அஜ என்பதின் சாதாரண அர்த்தம் பிறவி இல்லாத என்பது. அதுவும் பொருந்தும்.

527.மஹார்ஹ: -மஹ: என்றால் பூஜை. அர்ஹ: என்றால் அருகதை உடையவர். பூஜைக்குரியவர்..

528. ஸ்வாபாவ்ய: -இயற்கையாகவே மாறுபாடற்றவர் அல்லது பூஜைக்குரியவர்
. 
529. ஜிதாமித்ர; - அமித்திரர்கள் அதாவது நண்பர் அல்லாதவர், விரோதிகள் இவர்களை வெல்பவர். பக்தர்களின் ராகத்வேஷாதிகளான உட்பகைவரை அழிப்பவர்

530. ப்ரமோதன; -ப்ரமோதம் அதாவது மிகுந்த மகிழ்ச்சியை அளிப்பவர். எப்போதும் ஆனந்தத்தில் இருப்பவர்.

531. – ஆனந்த: - ஆனந்த வடிவானவர். 'ஸத்யம் ஞானம் ஆனந்தம் ப்ரம்ம.' அதவது பிரம்மானந்தம்.

532. நந்தன: -பக்தர்களுக்கு ஆனந்தம் அளிப்பவர். ஏனென்றால், 
533. நந்த:- அவரேதான் ஆனந்தம்

534. ஸத்யதர்மா-உண்மையான தர்மம் ஞானம் இவற்றை உடையவர். அவருடைய தர்மமான சரணாகதி தர்மத்தை பொறுப்பாக நடத்துபவர்..

535.த்ரிவிக்கிரம: -இதன் பொருள் மூன்றடியினால் உலகத்தை வ்யாபித்தவர் என்பது. ஆனால் அடுத்த நாமம் கபிலாவதாரத்தைக் குறிப்பதால் இதன் பொருள் மூன்று வேதங்களிலும் வ்யாபித்தவ்ர் அல்லது, விழிப்பு, உறக்கம், ஆழ்ந்த தூக்கம் இம்மூன்று நிலையம் கடந்து நான்காவது நிலையான துரீயவஸ்தையில் உள்ளவர் என்று கொள்ளலாம்.