Sri sankaracharya suprabhatam - Composition of HH.Pujayasri.Viswesvarananda Bharati of Shivaganga mutt

श्री शृंगेरि शिवगंगा शारदापीठाधिपति (1977-82) श्री विश्वेश्वरानंद भारति विरचित

श्री शंकराचार्य सुप्रभातम्

अज्ञानध्वांत सूर्याभां शारदा रूपिणीं शुभाम् 

ज्ञानप्रदां स्मराम्यंबां सर्वशक्तिमयीं सदा ॥ १ ॥

आचार्यवर्य करुणामय मोक्षदायिन्

अज्ञानजाड्य तिमिरापह दिव्यगात्र

प्रारब्धकर्मसुविमोचन ज्ञानराशे 

ते सार्वभौम गुरुशंकर सुप्रभातम् ॥ २ ॥

सर्वार्थसाधक, सदाशिव शांतमूर्ते

तेजोमयार्तिहर तात्विक मार्गदर्शिन्

पीयूषवर्षि परिपूर्णमुखेंदुबिंब

ते सार्वभौम गुरुशंकर सुप्रभातम् ॥ ३ ॥

दारिद्र्यनाशन दयामय दीनबंधो

धर्मस्वरूप धृतषण्मत धर्म संस्थ

श्री भारती विजय लब्धयशो विशाल

ते सार्वभौम गुरुशंकर सुप्रभातम् ॥ ४ ॥

श्री व्यासनिर्मित महोज्वल सूत्रभाष्य

निर्माण संगति धुरीण लसत्प्रभाव

ज्ञानप्रदान चणपादपयोजयुग्म

ते सार्वभौम गुरुशंकर सुप्रभातम् ॥ ५ ॥

आज्ञावशंवद रमा करुणाकटाक्ष

भूमाप्रदान गुणसिद्ध गुरुस्वभाव

आर्यांबिकातनय बंधविमोचकस्य 

ते सार्वभौम गुरुशंकर सुप्रभातम् ॥ ६ ॥

जन्मादि दुःख विनिवारण भक्तपोष

देहात्मधी भ्रमनिवारक ज्योतिरूप

श्री कालटी जनन शिष्य हृदब्जवास

ते सार्वभौम गुरुशंकर सुप्रभातम् ॥ ७ ॥

ब्रह्मण्यदेव तवशांत मुखारविंद

सन्दर्शनेन कलुषाऽनभिभूत चित्ताः

सच्चित्तयोगमुपयांतिनराः क्षणेन

त्वद्दर्शनं सुकृतिनां खलु जायतेहि ॥ ८ ॥

धी लक्ष्ययुक्त बुधसेविन भावगम्य

वैराग्य भाग्य वरदाभय पाणिपद्म

सर्वज्ञ पीठसमधिष्ठत पादपद्म

ते सार्वभौम गुरुशंकर सुप्रभातम् ॥ ९ ॥

श्री दक्षिणाभिमुखदेव महेश शंभो

विश्वार्तिभंजन विवेकि जनाळिवंद्य

ब्रह्मादि देवगणमानित मंत्रशक्ते

ते सार्वभौम गुरुशंकर सुप्रभातम् ॥ १० ॥

ध्यायामि नित्यमनवद्य पदद्वयं ते 

कैवल्यदायि कमलामल कांतिकांतम् 

साक्षाच्छिवात्मकममेय महानुभाव

श्री सार्वभौम गुरुशंकर सुप्रभातम् ॥ ११ ॥

भो, पूज्यपाद वृषभाचलवास विश्व

स्यात्म स्वरूप सदसद्गुणसारगम्य

अद्वैत राज्य परिपालक संयमिंद्र

ते सार्वभौम गुरुशंकर सुप्रभातम् ॥ १२ ॥

सत्पंडितेड्य धृतदंड कमंडलु श्री 

हस्ताब्जदिव्य पदपंकज पाहि पाहि

भावं प्रभोध्य भवबंध विमोचकस्य

ते सार्वभौम गुरुशंकर सुप्रभातम् ॥ १३ ॥

बालं विशुद्ध परमात्मरतिं सुधीरं 

दृष्ट्वा करामलक सार्थक नामधेयं 

कृत्वा स्वशिष्यमधिकं मुदितोसितस्य

ते सार्वभौम गुरुशंकर सुप्रभातम् ॥ १४ ॥

सद्ब्रह्मचर्य गुरुसन्निधिवासकाले

भिक्षाटनाय गृहिणोऽधिक भक्तिभाजः 

रिक्तस्य गेहमकरोः कमलानिवासं 

ते सार्वभौम गुरुशंकर सुप्रभातम् ॥ १५ ॥

तद्वेश्मयत्स्व यमुपेयुषि दीनबंधौ

त्वय्यादरेण गृहिणीकिल सा द्विजस्य

धात्रीफलं किमपि दत्तवतीहि तुभ्यं 

ते सार्वभौम गुरुशंकर सुप्रभातम् ॥ १६ ॥

श्री पद्मपाद मुनिसेवित पादपद्म

सत्तोटकाभिध सुशिष्य गुणाळि तृप्त

सत्सेवकोत्तम करामलकादियुक्त

बुद्धि प्रधान बुधवर्य सुरेश्वराप्त ॥ १७ ॥

व्याघ्राजिनस्थ गुरुपुंगव शर्मदायिन्

त्वत्सेवया विदित शांतिरसाति शुद्धान् 

भक्तिप्रभाव चतुरांस्तव शिष्य मुख्यान् 

ध्यायामि चेतसि ममात्मविकाससिद्ध्यै ॥ १८ ॥

शंकाकळंक परिहारक किंकराणां

प्राग्जोतिरादिसुविसारि विभाविशेष

प्राभाकरादि घनपंडित सेवितांघ्रे

ते सार्वभौम गुरुशंकर सुप्रभातम् ॥ १९ ॥

संसार पंकपरिशोषण तीक्षरश्मे 

तापत्रयाकुलजनौघ सुखप्रदातः

साम्राज्यपालन सुधन्व नृपाल शास्तः

ते सार्वभौम गुरुशंकर सुप्रभातम् ॥ २० ॥

सर्वापदुद्धरण सांद्र दयारसाब्धे

सान्निध्यवर्ति हित शिष्य समाहितात्मन् 

भाष्यार्थ बोधन विधान कलाप्रवीण

ते सार्वभौम गुरुशंकर सुप्रभातम् ॥ २१ ॥

तुंगांबु शीकर कणैश्शिशिरे नृनारी

संदोह रंजित झषप्रकर प्रमोदे

हंसावळी शुकपिकादि विकूजितैश्च

रम्ये पवित्र भुविशृंगगितौ विशालम् ॥ २२ ॥

निर्माय सुंदर शिलाकृत शिल्पजालैः 

प्रासादमद्भुत विमान विशेषमग्र्यम्

संपूज्य दिव्यमणि भूषण भूषितांगीं 

श्री शारदां प्रमुदितामकरोस्त्व मंभाम् ॥ २३ ॥

तत्राद्यपीठ गुरुयोग्य पदेनिवेश्य

श्रीमत्सुरेश्वर यतीश्वर मात्मतुल्यम् 

भाष्यादि वार्तिक मुखानपि कारयित्वा

तुंगाप्रशस्त पुलिने खलु तेन भासि ॥ २४ ॥

ध्यायामि संशय विदारण धी विशालं 

तं सद्गुरुं शिवगुरोः प्रिय पुत्ररत्नम्

धीमंतमांतर गुहानिलयं नितांतं

श्री शंकरार्य गुरुवर्यमहं हि सिद्ध्यै ॥ २५ ॥

ये मानवास्सतत माश्रमिण स्समस्त 

मूर्ति प्रकाशन गुरुं परमार्थ बुद्ध्या

ध्यायंतिते तत महोद्धत दुःखवार्धि

संतारणेननितरां मुदिता भवंति ॥ २६ ॥

रागादिरोग परिशोषण भेषजं तं 

योगादि भूषण विवर्धित देहकांतिम् 

शिष्याळि सेवित मनोज्ञ पदांबुजातं 

श्री वेद वारिनिधि पूर्ण शरत्सुधांशुम् ॥ २७ ॥

सेवेद्य संसृति दवानल तापशांत्यै

श्री शंकरार्य इति पूजितनामधेयम् 

अद्वैत तत्त्व महिमोन्नति मूर्तिमंतं 

विश्वैक शांति सुख दान विधान शीलम् ॥ २८ ॥

चंद्रार्कवायु सलिलाग्नि वियत्सुधीज्या

मूर्त्या समस्त जगतां परिपालकं तम् 

फाले विराजदति दिव्य महा प्रकारशम् 

ध्यायामि श्री शिवगुरुं ममबुद्धिकोशे ॥ २९ ॥

यो मंदधीर्गिरिरिति प्रथितोति भक्त

श्शिष्यस्त्वदीय करुणार्द्रदृशैव सद्यः 

स्तुत्याकुशाग्रधिषणो भुवितोटकाख्य

वृत्तैस्सतोटक इति प्रथितो बभूव ॥ ३० ॥

भो शंकरार्य, मुनिवर्य, शृतिप्रशस्त

दीव्यद्गुणाढ्य विदिताखिल शास्त्र तत्व

अज्ञान रात्रि मिहिराखिल लोकबंधो

ब्रह्माद्वयैक रसपूर्ण निगूढ तत्व ॥ ३१ ॥

सर्वांग तापक भवाभिद दीर्घरोग

संहारकामृत महौषधि रूपनित्यम् 

सेवां त्वदीय पदपंकज भक्तिरूपां

कृत्वाथवंदन शतानि समर्पयामि ॥ ३२ ॥

श्री शंकराखिलगुरो तव सुप्रभात

मित्थं सुबोधवचसा रचितं मया यत् 

त्वत्प्रेरणैव तवमे न गुणोपि दोषः

त्वत्कारितं कृतवतस्त्वदनुग्रहेण ॥ ३३ ॥

भक्त्याहि येभुवि जगद्गुरु सार्वभौम

श्री सुप्रभात विनुतिं मनुजाः पठंति

तेयांति शान्ति सुखलक्ष्य विदोखिलार्थान् 

मुक्तिंच शंकर गुरोस्सदनुग्रहेण ॥ ३४ ॥

इति श्री शंकराचार्य सुप्रभातस्य कीर्तनात् 

मोहभ्रांति विमुक्तास्स्युस्स्वयमेव न संशयः ॥ ३५ ॥

ध्यायामो भगवत्पाद शंकरं करुणालयम्

सुख शांति मनोभीष्टसिद्धिदं शुद्धं बुद्धिदम् ॥ ३६ ॥ 

https://drive.google.com/file/d/0B3VQPnFaIiFUdnA2emlUZG1oTUk/view?usp=sharing 👆🏻 श्रीशङ्करभगवत्पादसुप्रभातम्। अस्य बहुषु स्थलेषु स्थाप्य प्रकटीकुर्वन्तु इति प्रार्थये।