Uddhava gita - Vibhootis in tamil

Courtesy:Smt.Dr,Saroja Ramanujam

உத்தவ கீதை - விபூதிகள்

அத்தியாயம் 16
உத்தவர் கூறினார்.
"மூவுலகத்திலும் உம்முடைய பெருமைகளாக கருதப்படுபவை எவையோ அவைகளைப் பற்றி எல்லாம் எனக்குக் கூறவேண்டும். ."

பகவான் கூறியது,
"அர்ஜுனன் என்னிடம் குருக்ஷேத்ரத்தில் இதே கேள்வியைக் கேட்டான்.(விபூதி யோகம் – BG chapter 10)
நான் இவ்வுயிர்களுக்கு ஆத்மா , நண்பன், ஈஸ்வரன், நான் ஸ்ருஷ்டித்த அனைத்து பொருளாயும் இருப்பவன், அவற்றின் பிறப்பும் , இருப்பும், முடிவுமாக இருப்பவன்.
நான், செல்பவர்களின் கதி. கணக்கிடுபவர்களிடம் காலம். குணங்களில் சமத்துவம். குணமுள்ளவற்றில் இயற்கையான குணம்.மகான்களில் மகத்துவம். சூக்ஷ்மங்களுள் ஜீவன். வெல்வதற்கரியவற்றுள் மனம். 
வேதங்களில் நான் பிரம்மா. மந்திரங்களில் பிரணவம். அக்ஷரங்களில் அகாரம். சந்தங்களில் காயத்ரீ. தேவர்களில் இந்திரன், வசுக்களுள் அக்னி, ஆதித்யர்களுள் விஷ்ணு, ருத்ரர்களில் நீலலோஹிதன்.

மகரிஷிகளுள் ப்ருகு, ராஜரிஷிகளில் மனு, தேவரிஷிகளில் நாரதர். பசுக்களுள் காமதேனு. சித்தர்களில் கபிலர் , பறவைகளில் கருடன், பிரஜாபதிகளுள் தக்ஷ பிரஜாபதி. பித்ருக்களில் அர்யமா. 
யானைகளில் ஐராவதம், நீர் வாழ் உயிர்களில் வருணன், ஒளிவிடும் பொருள்களில் நான் சூரியன், மனிதர்களில் அரசன். குதிரைகளில் உச்சைஸ்ரவஸ், உலோகங்களில் பொன், நிக்ரஹத்தில் யமன், சர்ப்பங்களில் நான் வாசுகி.

நாகங்களில் நான் அனந்தன், மிருகங்களில் சிங்கம், ஆஸ்ரமங்களில் சன்யாசம். வர்ணங்களில் முதல் வர்ணம். புண்ய தீர்த்தங்களில் நான் கங்கை, நீர்நிலைகளில் சமுத்ரம், ஆயுதங்களில் நான் வில், வில்லாளிகளில் நான் திரிபுரத்தை எரித்த சிவன்.

நான் தேவர்களின் வாசஸ்தலமாகிய மேரு. மலைகளில் நான் ஹிமயமலை. மரங்களுள் நான் அரச மரம். புரோஹிதர்களில் நான் வசிஷ்டர். பிரம்ம நிஷ்டர்களுள் நான் ப்ருஹஸ்பதி. சேனை நாயகர்களில் நான் ஸ்கந்தன்.
முனிவர்களுள் நாராயணன் (நரநாராயணர்கள் ) பிரம்மசாரிகளுள் சனத் குமாரர்.

காலங்களில் நான் வருடம், ருதுக்களில் வசந்தம், மாதங்களில் நான் மார்கழி. நக்ஷத்திரங்களில் நான் அபிஜித்.

யுகங்களில் க்ருத யுகம். வேதத்தை வகுத்தவர்களுள் நான் வியாசர்.கவிகளுள் ஞானியாகிய சுக்ராசாரியராக இருக்கிறேன். பக்வாங்களில் வாசுதேவனாகவும், , பக்தர்களில் நீயாகவும், கிம்புருஷர்களில் ஹனுமானாகவும், வித்யாதரர்களில் சுதர்சனனாகவும் இருக்கிறேன்.

பலவான்களுடைய பலமாகவும், சாதுக்களின் செயலாகவும், கந்தர்வர்களுள் விச்வாவசுவாகவும்,மலைகளின் ஸ்திரத்தன்மையாகவும், பூமியின் கந்தமாகவும், நீரில் சுவையாகவும், ஆகாயத்தின் குணமான சப்தமாகவும் இருக்கிறேன்.

பிராம்மணர்களை பூஜிப்பவர்களில் நான் பலி. வீரர்களில் அர்ஜுனன். தேஜஸ், செல்வம், கீர்த்தி, ஐஸ்வர்யம், நாணம், த்யாகம், மனமகிழ்ச்சி , பாக்கியம், வீர்யம், பொறுமை, விஞ்ஞானம் இவை எங்கெங்கு காணப்படுகின்றனவோ அவை என் அம்சங்கள் என அறிவாய்.

இவ்வாறாக என் விபூதிகள் உனக்கு சுருக்கமாகக் கூறப்பட்டன. என்னை முக்கியமாகக் கொண்டவன் என்னிடம் பக்தியுடன் கூடிய புத்தியால் வாக்கையும் மனதையும் பிராணனையும் அடக்க வேண்டும் .