Shambunatana stotra done by Patanjali-Sanskrit

🌷🙏  *॥ श्रीपतञ्जलिकृत-शम्भुनटनम्॥*

सदञ्चितमुदञ्चित-निकुञ्चितपदं झलझलञ्चलित-मञ्जुकटकं

पतञ्जलि-दृगञ्जनमनञ्जनमचञ्चलपदं जनन-भञ्जनकरम्।

कदम्बरुचिमम्बरवसं परममम्बुद-कदम्बक-विडम्बक-गलं

चिदम्बुदमणिं बुध-हृदम्बुज-रविं पर-चिदम्बर-नटं हृदि भज॥१॥

हरं त्रिपुर-भञ्जनमनन्त-कृतकङ्कणमखण्डदयमन्त-रहितं

विरिञ्चि-सुरसंहति-पुरन्दर-विचिन्तित-पदं तरुण-चन्द्र-मकुटम्।

परं पद-विखण्डित-यमं भसित-मण्डित-तनुं मदन-वञ्चन-परं

चिरन्तनममुं प्रणत-सञ्चित-निधिं परचिदम्बर-नटं हृदि भज॥२॥

अवन्तमखिलं जगदभङ्गगुणतुङ्गममतं धृत-विधुं सुरसरित्-

तरङ्ग-निकुरुम्ब-धृति-लम्पट-जटं शमन-डम्बर-हरं भव-हरम्।

शिवं दश-दिगन्तर-विजृम्भित-करं कर-लसन्-मृगशिशुं पशुपतिं

हरं शशि-धनञ्जय-पतङ्ग-नयनं पर-चिदम्बर-नटं हृदि भज॥३॥

अनन्त-नवरत्न-विलसत्कटक-किङ्किणि-झलंझल-झलञ्झलरवं

मुकुन्द-विधि-हस्तगत-मद्दल-लय-ध्वनि-धिमिद्धिमित-नर्तन-पदम्।

शकुन्तरथ-बर्हिरथ(वह्निरथ)-नन्दिमुख-दन्तिमुख-भृङ्गि-रिटि-सङ्घ-निकटं

सनन्द-सनक-प्रमुख-वन्दित-पदं पर-चिदम्बर-नटं हृदि भज॥४॥

अनन्त-महिमं त्रिदश-वन्द्य-चरणं मुनि-हृदन्तर-वसन्तममलं

कबन्ध-वियदिन्द्ववनि-गन्धवह-वह्नि-मखबन्धु-रवि-मञ्जु-वपुषम्।

अनन्त-विभवं त्रिजगदन्तरमणिं त्रिणयनं त्रिपुर-खण्डन-परं

सनन्द-मुनि-वन्दित-पदं सकरुणं पर-चिदम्बर-नटं हृदि भज॥५॥

अचिन्त्यमलिबृन्द-रुचिबन्धुर-गल-स्फुरित-कुन्द-निकुरुम्ब-धवलं

मुकुन्द-सुरबृन्द-बलहन्तृ-कृत-वन्दन-लसन्तमहिकुण्डल-धरम्।

अकम्पमनुकम्पित-रतिं सुजन-मङ्गल-निधिं गजहरं पशुपतिं

धनञ्जय-नुतं प्रणत-रञ्जन-परं पर-चिदम्बर-नटं हृदि भज॥६॥

परं सुरवरं पुरहरं पशुपतिं जनित-दन्तिमुख-षण्मुखममुं

मृडं कनक-पिङ्गल-जटं सनक-पङ्कज-रविं सुमनसं हिम-रुचिम्।

असङ्ग-मनसं जलधि-जन्म-गरलं कबलयन्तमतुलं गुणनिधिं

सनन्दवरदं शमितमिन्दुवदनं पर-चिदम्बर-नटं हृदि भज॥७॥

अजं क्षितिरथं भुजगपुङ्गव-गुणं कनक-शृङ्गि-धनुषं करलसत्

कुरङ्क-पृथु-टङ्क-परशुं रुचिर-कुङ्कुम-रुचिं डमरुकं च दधतम्।

मुकुन्द-विशिखं नमदवन्ध्य-फलदं निगम-बृन्द-तुरगं निरुपमं

स चण्डिकममुं झटिति-संहृत-पुरं पर-चिदम्बर-नटं हृदि भज॥८॥

अनङ्ग-परिपन्थिनमजं क्षिति-धुरंधरमलं करुणयन्तमखिलं

ज्वलन्तमनलं दधतमन्तकरिपुं सततमिन्द्रसुर-वन्दित-पदम्।

उदञ्चदरविन्द-कुल-बन्धु-शतबिम्ब-रुचि-संहति-सुगन्धि-वपुषं

पतञ्जलि-नुतं प्रणव-पञ्जर-शुकं पर-चिदम्बर-नटं हॄदि भज॥९॥

इति स्तवममुं भुजग-पुङ्गव-कृतं प्रतिदिनं पठति यः कृतमुखः

सदः प्रभु-पदद्वितय-दर्शनपदं सुललितं चरण-शृङ्ग-रहितम्।

स्मरः प्रभव-संभव-हरित्पति-हरि-प्रमुख दिव्य-नुत-शङ्करपदं

स गच्छति परं न तु जनुर्जलनिधिं परम-दुःख-जनकं दुरितदम्॥१०॥