*अश्रुपूर्णश्रद्धाञ्जलिपञ्चकम्।*
पर्यट्य भारतभुवि प्रचुरं नृसेवी
नव्यं विकास्य कमलं किल वाजपेयी।
जीवन् गतो दिविषदां नगरं मृतारि:
शृण्वन्तु हे सहृदया अटलो विहारी।। 1
व्यर्थं ब्रवीषि निजराष्ट्रज एष नेता
मृत्युं गतोऽद्य मतिमानटलो विहारी।
श्रान्तिं विनेतुमहहा दिवि देवतात्मा
मन्ये विशालहृदयो गतवान् महात्मा। 2
मृत्वापि यो जनमनस्सदने दयालु:
राराज्यते कविवर: प्रथित: कृपालु:।
भूत्वा युवा सकलराष्ट्रसुखाय सद्य:
श्रीमान् चलिष्यति महान् जननायकोऽयम्।। 3
केचिद् रुदन्ति सहसा विलपन्ति केचित्
केचिद्रवन्ति मनुजा मृतिवृत्तदु:खै:।
केचित् कपोलयुगलं स्रवदश्रुपातै:
संक्षालयन्ति जनताजनकप्रयाते।। 4
रोरोत्ति दिव्यवसुधा निजपुत्रमृत्युं
श्रुत्वाधुना शृणुत हे कवय: दयार्द्रा।
शून्याङ्कमेव विकला प्रविलोक्य मूर्च्छा-
मेतीव हन्त हृदयं वदतीह तीव्रम्।5
****अरविन्द:।
No comments:
Post a Comment