Miracles of Thiruvarur Thyagaraja temple

திருவாரூா் அருள்மிகு தியாகராஜா் சுவாமி திருக்கோயில் அற்புதங்கள் :

 

1) திருவாரூர் ஆலயத்தின் இராஜகோபுரம் மூன்றாம் குலோத்துங்கன் என்ற சோழ மன்னவர் பாண்டிய நாட்டை வெற்றிகண்டதன் நினைவாக எழுப்ப பெற்றதாகும், இவ்வரசரை "இறைவரே தம் தோழர்"என்று குறிப்பது போல கல்வெட்டு வாசகங்கள் கிடைக்கின்றன.

2) தேர்திருவிழாவிற்கு முன்பும் பின்பும் இறைவர் எழுந்தருளும் *"தேவாசிரியன் மண்டபம்"* திருக்காவணம், வன்மிகாதிபதி சபை, சபாபதி மண்டபம் என்றும் வழங்கப்படும்.

3) தேவாசிரியன் மண்டபத்தின் முன்புள்ள கூரையில்லாத தூண்கள், விழாக்காலங்களில் பந்தல் அமைப்பதற்காக நிறுவப்பட்டிருக்கலாம் என்று வரலாற்று ஆய்வர் கருதுகின்றனர்

4) *"தேவாசிரியன்"* என்ற திருப்பெயர் இலக்கியங்களில் பெரியபுராணத்தில் *"தேனுறக் கற்பக வாசமாலைத் தேவாசிரியன்"* என்று தடுத்தாட்கொண்ட பகுதியிலும், முதலாம் குலோத்துங்க சோழரின் 44ஆம் ஆட்சியாண்டு கல்வெட்டு ஒன்றிலும் முதன்முதலாக பதிவாகி உள்ளது

5) ஆரூர் பூங்கோயிலின் தற்போதய கொடிமரம் தஞ்சை மராட்டிய மன்னர்களால் நிறுவப் பெற்றுள்ளதாம், இக்கொடி மரத்தில் இறைவருக்கு நேரெதிரே சுந்தர மூர்த்தி சுவாமிகள், மராட்டிய கால கலையம்சத்துடன் காட்சி தருகிறார்

6) இக்கொடிமரத்தை தாண்டி இறைவரின் சன்னிதானத்திற்குள் நுழையும் திருவாயிலுக்கு *"அணுக்கன் திருவாயில்"* என்று பெயர், இவ்வாயிலின் மேலே உள்ள கோபுரமே ஆரூர் ஆலய கோபுரங்கள் யாவற்றிலும் பழமையானது ஆகும்.

7) பூங்கோயிலின் உட்பிரகாரத்தில் காட்சிகொடுத்தார் சன்னதிக்கு அருகில், *"சிறுத்தொண்ட நாயனாரால் வாதாபியில் இருந்து கொண்டு வரப்பெற்ற சாளுக்கிய பாணி விநாயகர் காட்சி தருகிறார்"*.

8) பூங்கோயிலுக்கு பக்கவாட்டில் அமைந்துள்ள தியாகராச சுவாமியின் கருவறை முன்மண்டத்திலேயே தியாகராசர் எழுந்தருளியுள்ளர், இவ்வாலயத்தின் கருவறை கல்திரையிட்டு மறைக்கப் பட்டுள்ளது.

9) தியாகரசப் பெருமானின் திருமேனி மராட்டிய மன்னவர்களின் காலம் தொட்டே தற்போது போல முழுவதும் மறைத்து அலங்கரிக்கப் படுகின்றது, அதற்கு முற்காலமெல்லாம் தியாகராசரின் முழுத்திருமேனியும் தரிசனம் ஆகும்படி இருந்துள்ளது என்தற்கு ஆலயத்தில் உள்ள பழமையான சிற்பங்களும் ஓவியங்களும் சான்று கூறுகின்றன.

10) இறைவருக்கு *"தியாகராசர்"* என்ற பெயர் ஏற்பட்டதும் மராட்டியர் காலத்தினை ஒட்டியே என்றும் கருதப்படுகிறது, அதற்கு முன்புள்ள எந்த ஒரு இலக்கிய கல்வெட்டு தரவுகளிலும் *"தியாகராசர்"* என்ற பெயர் காணப்படவில்லை, *"உடையார் வீதிவிடங்கத்தேவர்"* என்பது பொதுவாக காணப்படும் இறைவர் திருநாமம் ஆகும், அதே சமயம் சோழர் கால கல்வெட்டுகள் சில *"தியாகவினோதன்"* என்று இறைவரை குறிக்கின்றன, இதையொட்டி தியாகாரசன் என்ற திருநாமம் ஏற்பட்டிருக்கலாம் என்பர்

 11) தேவாசிரியன் மண்டபத்தின் உட்புற விதானத்திலும், பூங்கோயில் பிரகாரத்தில் உள்ள சந்திரசேகர மண்டபத்திலும் காணப்படும் சிற்ப தொகுதிகளில் *"தியாகராஜ பெருமான் தற்போது போல் முழுதும் மறைக்கப் பட்ட அலங்காரத்தில் இல்லாமல் காட்சி தருவதனை கண்டு மகிழலாம்"*

12) திருஞானசம்பந்தப் பெருமான், அப்பர் பெருமான், சுந்தர மூர்த்தி சுவாமிகள், திருநீலகண்டத்து யாழ்பாண நாயனார், விறன்மிண்ட நாயனார், தண்டியடிகள் நாயனார், செருத்துணை நாயனார், கழற்சிங்க நாயனார், நமிநந்தியடிகள் நாயனார், சோமாசிமாற நாயனார், சேரமான்பெருமாள் நாயனார், ஏயர்கோன் கலிக்காம நாயனார், சடையனார் நாயனார், இசைஞானி நாய்ச்சியார் ஆகிய அருட்தலைவர்கள் ஆரூர் வரலாற்றுடன் தொடர்பு உடையவர்கள் ஆவார்கள்

13) பண்டை காலங்களில் ஆரூர் விழாக்களில், *"முதலிய மூவர் திருவிழா"* என்று ஒரு உற்சவம் நிகழ்ந்துள்ளது, இறைவர் திருமுன்னர் *"சம்பந்தப் பெருமான், அப்பர் சுவாமிகள், சுந்தரமூர்த்தி சுவாமிகள்"* உற்சவம் நடத்தப்படும், இதனை ஆரூர் கல்வெட்டுகள் ஓவியங்கள் மெய்ப்பிக்கின்றன, 

14) அனபாய சோழரது கல்வெட்டு ஒன்றில் *"ஸ்ரீமத் பிரஹ்ம புரீச, வாகதிபதி, ஸ்வஸ்வாமி மித்ர"* என்று முறையே மூவர் முதலிகள் குறிக்கப் பட்டுள்ளனர்

15) ஆரூரில் *"காமிகாகமம்"* பின்பற்ற பட்டு நித்திய நைமித்திக வழிபாடுகள் நிகழ்கின்றன, இதனை *"துர்வாச மகரிஷி மரபில் வந்த நயினார்கள் என்னும் சிவாச்சார்யார்கள் செய்கின்றனர்"*

16) தியாகராசரையும் புற்றிடங் கொண்டாரையும் இவர்கள் ஆராதிக்கும் தருணம், மார்பின் குறுக்கே *"யோகபரிவட்டம்"* என்னும் வேட்டியை தரிப்பர், இந்த சிறப்பு திருவாரூர் நயினார்களுக்கு மட்டும் உரியதாகும்

17) நயினார்களுக்கு பூசையின் பொழுது உதவி புரிவோர் *"பிரமராயர்"* என்று அழைக்கப் படும் அந்தணர்கள் ஆவார்கள்.

18) பிரமராயர்களும் சிவாச்சார்யர்களேயாவர், ஆயினும் இவர்களுக்கு மூலட்டானம் மற்றும் தியாகர் சன்னதியில் பூசிக்கும் உரிமை இல்லை என்றாலும் ஆலயத்தின் பரிவார மூர்த்திகளை இவர்களே பூசிப்பர்

 19) விழுப்பெருமர் என்னும் பிரிவினரே தியாகருக்கு புள்ளத்தண்டு இட்டு சுமக்கும் உரிமை உடையவர்கள் ஆவார்கள், இவர்கள் புள்ளத்தண்டுடன் மணித்தண்டு என்னும் சிறிய தண்டினை பிணைத்து பிரத்யோக முடிச்சிகள் மூலம் யாரும் அறியா வண்ணம் தியாகரை அஜபா நடனத்திற்கு தயார் செய்வர், இம்முறைக்கு *"புள்ளத்தண்டு இரகசியம்"* என்று பெயர் 

20) தமிழகத்து கோயில்களிலேயே *"இண்டைமாலை"* சிறப்பு தியாகருக்கு மட்டுமே உரிய சிறப்பாகும், *"மல்லிகை, செவ்வந்தி, போன்ற சுகந்த மலர்களால் கட்டப்பெறும் ஒருசோடி மாலைகள் இண்டை மாலை எனப்படும்"*, இதனை சாயரட்சையின் போது அணிவிப்பர்

21) செவ்வந்தி தோடு, நீலோத்பல மலர், இண்டைமாலை ஆகியவை தியாகரசருக்கு மட்டுமே உரிய தனிச்சிறப்புகள் ஆகும். இதனை *"இண்டை செஞ்சடை வைத்த இயல்பினான்"* என்று அப்பரடிகள் பாடிப்பரவுகின்றனர்🙏🏻😭

22) எல்லா ஆலயங்களிலும் மலர்களை சரமாகவோ மாலையாகவோ கட்டித்தான் இறைவனுக்கு சாத்துவர், ஆனால் *"தியாகராசருக்கு மல்லிகை, முல்லை, செவ்வந்தி, பவளமல்லி முதலிய மலர்களை உதிரியாகவே மேல்மரப்பியும் கொட்டியும் அலங்கரிப்பர்"* இம்முறைக்கு *"திருப்பணி சாத்துதல்"* என்று பெயர், சாயரட்சையில் திருப்பணி சாத்தப் பெறுவதனையும் அதன்பின்னரான தீபாராதனையும் கண்டு கண்டு நம் கருவேரறுக்கலாம்

23) *"திருப்பணி சாத்துதலுக்கு என்று தனி விழாவே நடத்தப் பெறும்"*, புரட்டாசி மாதம் பூரட்டாதி நாளன்று செங்கழுநீர் ஓடையில் இருந்து மலர்கள் கொய்து பல்லக்கில் வைத்து கொண்டு வரப்பெற்று விசேச பூசைகளுடன் இறைவனுக்கு சாத்தப்பெறும், இதற்கு *"நிறைபணி சாத்துதல் விழா"* என்ற பெயர், அன்று கோயிலின் ஆஸ்தான திருமாலைகட்டிக்கு பரிவட்ம் கட்டி மரியாதை செய்வர்

24) சந்திர சேகரர் ஈசானத்திசையில் வலம்வரும் பொழுது, ஆரூர் கோயில் முட்டுக்காரர் *"சுத்த மத்தளத்தை தலையில் வைத்து கொண்டு வாசிப்பார் இதற்கு பூத நிருத்தம் என்று பெயர்"*, இதன் பொழுது மத்தளக்காரரை ஒரு வேட்டியால் மறைப்பர் அந்த மறைப்பிற்குள் பூதகணங்கள் வந்து ஆடிப்பாடி மகிழும் என்பது ஐதீகம், இது பழமையான ஒன்று என்பதனை தேவாசிரியனில் காணப்பெறும் ஓவியங்களால் எண்ணலாம்

25) தியாகருக்கு இசைக்கப் பெறும் பதினெட்டு வகை வாத்யங்களில் குறிக்கதக்கவை *"பஞ்சமுக வாத்யம், சுத்தமத்தளம், பாரிநாயனம், சங்கு, கொடுகொட்டி"* ஆகும், விசேச பூசைகளின் பொழுது திரைக்கு பின்புறம் நின்று சுத்த மத்தளக்காரரும் பாரி நாயனக்காரரும் வாசிக்கும் இலயம் இறைவருக்கு மிக மகிழ்வானதாம்

26) ஆரூர் கோயிலில் பூசைக்கு பிறகு வழங்கப்பெறும் திருநீற்றினை *"திருமந்திரம்"* என்ற பெயரில் வழங்குவர், இது *"மந்திரமாவது நீறு"* என்ற ஆச்சார்ய வாக்குடன் வைத்து எண்ணத்தக்கதாம்

27) தேவாரம் திருவாசகம் திருமுறைகள் அல்லாமல் 36 தமிழ்நூல்கள் ஏராளமான தனிப்பாடல்கள் அருட்புலவர்களால் தமிழில் திருவாரூர் இறைவர் மீது பாடப்பெற்றுள்ளது இவை தவிர 28 வடமொழி நூல்கள் தியாகேசர் புகழ் பாடுகின்றன, இவை தவிர *"சங்கர பல்லக்கி சேவ பிரபந்தம், தியாகராஜ விநோத சித்ர பிரபஞ்சமு, தியாகேச பதமுலு, பஞ்சரத்ன பிரபந்தம்"* உள்ளிட்ட தெலுங்கு நூல்களும் *"தியாகேஸ்வர ஆகமோத்த தியான, தியாகேச மாக்தமிய, தியாராஜ விலாச, கமலாலய மாத்மிய"* என்னும் மாராட்டிய மொழி நூல்களும் புற்றிடங்கொண்ட புண்ணியத்தை பாடப்பரவுகின்றன

 28) ஆருர் ஆழித்தேர் விழா மிகத்தொன்மையான ஒன்றாகும், தஞ்சை சரஸ்வதி மஹாலில் உள்ள மராட்டியர் ஆவணம் ஒன்றில் கிபி 1843ஆம் ஆண்டு மாசி 8ஆந்தேதி முதல் சித்திரை 2ஆம் நாள் வரை ஐம்பத்தைந்து நாள் ஆழித்தேர் விழா நடைபெற்றதாக அறிவிக்கிறது, 

29) திருவாரூர் ஆழித்தேர் விழா அல்லது பங்குனித் திருவிழா என்பதனை அப்பர்சுவாமிகள் முன்னின்று நடத்துவதாக ஐதீகம் ஆதலால் *"இவ்விழா அப்பர் விழா"* என்றே அழைக்கப் பெறுகின்றது,

30) ஆலயத்தின் *"தைப்பூச உற்சவத்தினை திருஞானசம்பந்தப் பெருமானார் முன்னின்று நடத்துவதால் இது சம்பந்தர் விழா"* எனப்பெறும், அப்பரடிகள் பங்குனி விழாவிற்கு இத்தலத்தில் பந்தகால் முகூர்த்தம் செய்துவிட்டு தலயாத்திரை தொடங்காயதாக வழிவழிச் செய்தி கூறுகிறது,

31) கொடியேற்றத்திற்கு முதல்நாள் அப்பர்பெருமான் திருவீதி உலாவந்து தியாகேசப் பெருமானை தரிசனம் செய்வார் அப்பொழுது இறைவர் அப்பரடிகளுக்கு திருவோடு வழங்கி வரவேற்பார், இது விழாவிற்கு அப்பர் பெருமான் வருகை தந்ததை குறிக்கிறது, பின்னரே மறுநாள் கொடியேற்றம் நிகழும், இதே போல தைப்பூச விழாவில் பிள்ளை பெருமானார் திருமேனி எழுந்தருளச் செய்யப் பெற்று அவர்தம் முன்னிலையிலேயே பந்தக்கால் முகூர்த்தம் செய்யப்பெறும்

32) கொடியெற்றத்திற்கு முன்பு *"ஸ்ரீமுகம் வாசித்தல்"* என்ற ஒரு ஐதீகம் உள்ளது, இதன்படி உற்சவத் தொடக்கம் செய்வதனை நயினாரும் கோயில் அதிகாரியும் இறைவருக்கு கடிதமாக படித்து தெரிவிப்பர், தொடர்ந்து *"ஆலயத்தின் சொத்துரிமை பெற்றவரும் முதல் மரியாதைக்கு உரியவருமான சண்டேச நாயனாரிடத்து ஸ்ரீமுகம் வாசிக்கப்பெறும்"*,

33) சண்டேச நாயனார் உலகத்தின் அனைத்து தேவாலய விஷ்ணுவாலய பிரம்மாலய தேவியாலய முருகாலயம் உள்ளிட்ட அனைத்து ஆலயங்களுக்கும் அடியார்கள் குடியிருக்கும் அனைத்து பகுதிகளுக்கும் தன்னிடத்து வாசிக்கப் பெற்ற திருமுகத்தை அனுப்பி அனைவரையும் *"ஆழித்தேர் காண அழைப்பதாக ஐதீகம்"*

34) இதன்படி ஆரூர் தேர் காணவரும் ஒவ்வொரு உயிரும் சண்டேச நாயனாரின் நேரடி அழைப்பின் பெயரில் வந்ததாக கருதப்படும், ஆரூர் தேர்காண வரும் யாவரும் நாயனாரின் விருந்தாளிகள் ஆவார்கள் அவர்களை நிந்தித்தல் சாடுதல் கடுஞ் சிவாபராதமாகும்,

35) *"சுபமஸ்து, ஸ்ரீ தியாகராஜ சிவாக்ஞையாலே பரிபாலனம், ஆதி சண்டிகேஸ்வரன் அரன் அருளால் இப்பூதலத்தில் தேவாலயங்களில் தேவர்கள் வரவும் தாமும் வரவும். ஸ்ரீவிபவ நாம சம்வத்சரம் மாசிமாதம் 12ஆம் தியதி பெருமாள் தியாகராஜருக்கு மகத்துவஜாரோகணம் பண்ணி பங்குனி மாதம் ஐந்தாம் தேதி அடிய முடிய நெடிய திருவீதியில் திருவாழித்தேரில் திருவுலாச் செய்து அருளுகிறபடியால் ஸ்தான மகேஸ்வர பரிச்சன்னங்களைக் கூட்டிக்கொண்டு வரவும் தாமும் வரவும்"* என்பது முன்னொரு வருடத்தில் வாசிக்கப்பெற்ற திருமுகம் ஆகும்

36) இதன்படி கொடியேற்றத்தன்று இறைவர் மற்றும் சண்டேசர் அழைப்பால் வரும் மாகேசுரர்களுக்கு புதிய கோவணமும் திருவோடும் வழங்கி இராஜநாராயண மண்டபத்தில் உபசரிக்கப் பெறுவர்

37) ஆழித்தேரின் மரபீடம் தொடங்கி மேலேகட்டப் பெறும் கூரை தொம்பை சட்டங்கள் பொம்மைகள் முதலியவற்றுடன் கூடிய மொத்த எடை 300 டன் என்று தோராயமாக மதிப்பிடலாம்

38) தேர் செலுத்த ஏதுவாக 1.5 அடி நீளம், 2.5 அடி உயரம், 1 அடி அகலமுள்ள 450க்கும் மேற்பட்ட முட்டு கட்டைகள் தயாரித்து தேருக்கு பின்னால் சிறிய வண்டிகளில் வந்து கொண்டிருக்கும், ஒரு முட்டுகட்டையை இரண்டு முறைக்கு மேல் பயன்படுத்துவது அரிதான ஒன்று

39) 450 சதுர அடி அகலம் கொண்டது ஒரு தேர் திரரைச்சீலை ஆகும், இது போல 17க்கும் அதிகமான திரசை்சீலைகள் தேருக்கு பயன்படுத்தப் படுகின்றன

40) 20அடி நீளமுள்ள நான்கு வாசல் மாலைகள் நான்கு பக்கத்தையும் அலங்கரிக்க, 18 அடி உயரமுள்ள 20 தொம்பைகள் தேரில் தொங்கியாடுகின்றது

 41) தேவாசிரியன் மண்டபத்தின் விதானங்களை அலங்கரிக்கும் மராட்டியர் ஓவியங்களில், அக்காலத்தில் தியாகருக்கு நிகழ்ந்த பத்து நாள் உற்சவங்களும் ஆடல் பாடல் வானவேடிக்கைகளுடன் பதிவாகி உள்ளது, இப்படங்களை வரைந்தவர் *"சித்திரவேலை சிங்காதனம் என்னும் ஓவியர் ஆவார்"*, இவர் தன்னையும் ஓவியமாக இங்கு வரைந்து வைத்துள்ளார், தலையல் முண்டாசுடன் இடப்பில் வேட்டி துண்டு கட்டி உடலெங்கும் திருநீறு மணக்க பவ்யமாக காட்ச தருகிறார் சித்திரவேலை சிங்காதனம்

42) ஆரூரின் கீழ்புறமதில் வடகிழக்கில் இருக்கும் திருவாயில் வழியேதான் இறைவர் தேருக்கு எழுந்தருளுவார், இவ்வாயில் திருநீலகண்டத்து யாழ்பாண நாயனாருக்காக இறைவரால் சிறப்பாக திறக்கப் பெற்றதாகும்

43) இறைவர் தேருக்கு எழுந்தருளும் பாதை முழுக்க நடனபந்தல் அமைப்பது ஆரூரின் தனிச்சிறப்பு ஆகும், இச்சிறப்பினை தில்லையிலும் காணலாம்

44) வீதிவிடங்கரின் நாயகி அல்லியங்கோதை அம்மையாவார், இவர் கொடிமரத்திற்கு வடபுக்கம் தெற்கு நோக்கி சன்னதி கொண்டிருக்கிறார், இவர்தம் சன்னதியில் எழில் மிகு மராட்டியர் ஓவியங்கள் காணத்தக்கது

45) முற்காலத்தில் தியாகராஜப் பெருமான் சோமாசிமாற நாயனார் யாகத்திற்கு அம்பர் வரையிலும் நமிநந்தியடிகள் நாயனார் விழாவிற்கு ஏமப்பேரூர் வரையிலும் எழுந்தருளியதா கூறுவர், காலப்போக்கில் இவ்வுற்சவங்கள் நின்றுவிட்டன போலும்

46) திருவாரூர் ஆலயமும் வழிபாடும் ஆகம சைவசித்தாந்த வழியில் அமைந்து ஒழுகுவது ஆயினும், அகப்புறச்சமயிகளான *"மாவிரதிகள் பாசுபதர்"* முதலான அடியவர்களும் வந்திருந்து விழாவில் பங்கேற்றதாக அப்பர் பெருமான் பதிவு செய்கின்றார்

47) ஆரூர் தியாகருக்கு மிகப்பெரிய அளவில் செய்யப்பெறும் வழிபாடுகள் முசுகுந்தார்ச்சனை மற்றும் இந்திரார்ச்சனை ஆகும்

48) தியாகராஜப் பெருமானுக்கு நிகழ்த்தப் பெறும் நித்தியப்படி அபிசேகங்கள், "மரகத லிங்கமான விடங்ருக்கு நிகழ்த்தப்பெறும்" இம்மூர்த்தி திருமாலின் மார்பில் இருந்து பூசை காணுபவர் ஆவார், இவரே இந்திரன் மற்றும் முசுகுந்தர் மூலமாக ஆரூரக்கு வந்தவர் ஆவார்

49) தியாகராஜரின் திருமேனி உமைமுருகு உடனான சோமாஸ்கந்த மூர்த்தியாக உள்ளது, இவரை *"பவனி வீதிவிடங்கர்"* என்று அப்பர் பெருமான் குறிக்கின்றார், சூரிய சந்திர பிறைகளை சென்னியில் சூடி அம்பிகை கொண்டியாக இருக்க முகமண்டல தரிசனம் மட்டும் நாளும் தரும் இறைவர் இவர்

50) மற்றைய ஆலயங்கள் யாவிலும் தீபாராதனை நிறைவில் இறைவருக்கு திருநீறு அளிக்கையில் தீபாராதனை செய்த இடத்தில் இருந்தே சிவாச்சார்யார்கள் திருநீற்றை பூசுவது போல பாவிப்பர், ஆரூரில் மட்டும் தியாகராஜரின் திருமேணிக்கு அருகே சென்று திருநீற்றை தொட்டு அணிவித்து மீண்டும் இருந்த இடத்திற்கு வந்து உபசாரங்களை தொடர்வது தனிச்சிறப்பாகும்

51) ஆரூர் ஆழித்தேர் நிலையடைந்த பின்னர் தேவாசிரியனை அடையும் பெருமானார் அங்கே மேலும் பல மண்டகபடிகளை கண்டருளி யதாஸ்தானம் அடையும் விழாவினை பக்தக்காட்சி பெருவிழா என்று அழைத்து மகிழுவர்

  ஆரூரா தியாகேசா

  திருச்சிற்றம்பலம்