Friday, January 25, 2019

Birth of Andaal

Courtesy:Smt.Dr.Saroja Ramanujam

கிருஷ்ணாவதாரம் தசாவதாரத்தில் ஒன்பதாவது. எட்டு அவதாரத்தில் செய்ய முடியாததைச் செய்ய கிருஷ்ணாவதாரம் எடுத்தாராம். ஏனென்றால் இதில்தான் நம்மை உய்யச்செய்யும் கீதை சொல்லப்பட்டிருக்கிறது என்று சொல்வர் பெரியோர்..
பகவான் பாமரஜனங்களையும் உய்விக்க அறிவு ஒன்றும் இல்லாத ஆய்க்குலத்தில் , அதாவது சாஸ்திர அறிவு இல்லாமல் அன்பு ஒன்றையே அறிந்த ஆய்க்குலத்தில் வளர்ந்து அன்பின் மகத்துவத்தை எடுத்துரைத்தான். இந்த அன்பே பின்னர் கீதையாய் மலர்ந்தது. 
ஸஹஸ்ரநாம்னாம் புண்யானாம் த்ரிருக்தானாம் யத் பலம் 
தத் பலம் லபதே ஜந்து: க்ருஷ்ண இத்யக்ஷரமாதரத: 
கிருஷ்ணா என்ற பெயரை உச்சரித்த மாத்திரத்திலேயே ஆயிரம் நாமங்களை மூன்று முறை கூறிய பலன் , மனிதர் மாத்திரம் அல்ல எந்த உயிருக்கும் கிடைக்கிறது.
அப்படி இருக்கையில் கிருஷ்ணனை சதா ஸ்மரித்துக் கொண்டிருந்த கோப கோபியரைப் பற்றி சொல்லவும் வேண்டுமோ? 
த்வாபரயுகத்தில் கண்ணன் செய்ததை கலியுகத்தில் செய்தவள் ஆண்டாள். திருப்பாவை மூலம் பக்தி, கரம யோகம் ஞானயோகம் எல்லாவற்றையும் காட்டியவள். பக்தியில் மூன்று வகை. முதலாவது பூஜை, அவன் பாதங்களில் மலரிட்டு வணங்குவது. இரண்டாவது நாமசங்கீர்த்தனம் – அவன் நாமங்களை கீர்த்தனம் செய்வது, மூன்றாவது அவனையே சரணம் என்று அடைவது. இந்த மூன்று விதங்களும் முறையே திருப்பாவையின் முதல் பத்து, இரண்டாவது பத்து, மூன்றாவது பத்து பாசுரங்களில் சொல்லப்பட்டிருக்கின்றன. 
கோதா என்ற சொல்லின் பொருள் என்ன என்று பார்க்கலாமா?
காம் ததாதி இதி - பகவானை அடைய உதவும் வாக்கை அளித்தவள் 
கவா தத்தா –பூமியால் கொடுக்கப்பட்டவள்
கா: தமயதி- புலனடக்கத்தை போதிப்பவள்.
இனி கோதையின் அவதார ரஹஸ்யத்தைப் பார்ப்போம்.

பூதேவி வராஹப் பெருமானால் மீட்கப்பட்ட பின்னரும் வருத்தத்துடன் காணப் பட்டாளாம் . வராஹப் பெருமான் அதன் காரணத்தைக் கேட்க அவள் கூறினாள்.
'என் கஷ்டம் தீர்ந்தது. ஆனால் என் குழந்தைகள் தருமம் அறியாமல் உங்களை அடையும் வழி அறியாமல் அறியாமையில் மூழ்கி அவதிப்படுகிறார்களே? அவர்களை கரைசேர்க்க என்ன வழி என்று குழம்புகிறேன்."
"அஹம் சிஷ்யா ச தாஸீ ச பார்யா ச த்வயி மாதவ 
மத்க்ருதே சர்வபூதானாம் லகூபாயம் வாத ப்ரபோ"
அடியேன் உங்கள் சிஷ்யையாகவும், தாசியாகவும், பார்யையாகவும் இருக்கிறேன். அதனால் நீங்கள் என்னிடம் தயை கொண்டு எல்லோரும் பின்பற்றக் கூடிய எளிதான மார்க்கத்தை உரைக்கவேண்டுகிறேன் " என்றாள்.
வராஹ மூர்த்தி கூறினார் ,
ஸ்திதே மனஸி ஸுஸ்வஸ்தே சரீரே ஸதி யோ நர: 
தாதுஸாம்யே ஸ்திதே ஸ்மர்த்தா விஸ்வரூபம் ச மாம் அஜம்
தத: தம் ம்ரியமாணம் து ள் காஷ்ட பாஸான சந்நிபம் 
அஹம் ஸ்மராமி மத்பக்தம் நயாமி பரமம் கதிம்
" உடலும் மனமும் நல்ல நிலையில் உள்ளபோது எவன் ஒருவன் என்னை நினைத்துக் கொண்டிருக்கிறானோ அந்த என் பக்தனை அவன் மரணத் தருவாயில் செயலற்று கல்லைப்போலவோ கட்டையைப் போலவோ நினைவற்று இருந்தாலும் நான் அவனை நினைக்கிறேன் அவனுக்கு நல்ல கதியை அளிக்கிறேன்.. " என்றார்.
அதன் பின் பூதேவியை பூலோகத்தில் சென்று மக்களிடையே பக்தியைப் பரப்ப நியமித்தார். இதுதான் கோதாவதாரத்தின் ரகசியம்.
இவ்வாறு கோதா எனப்படும் ஆண்டாள் , நம்மையெல்லாம் ஆட்கொள்ளும் பொருட்டு துளசிச் செடியின் அருகில் தோன்றினாள். விஷ்ணுசித்தர் என்னும் பெரியாழ்வாரால் கண்டெடுக்கப் பட்டு வளர்ந்தாள். கண்ணனையே வரிக்கும் நோக்கத்துடன் வளர்ந்து தன் விருப்பப்படியே அவனைச் சேர்ந்தாள்.
கண்ணனையே மணாளனாக வரித்த இன்னொரு பக்தை மீரா. ஆனால் அவள் அரச குடும்பத்தில் பிறந்த காரணத்தால் அவள் எண்ணம் நிறைவேறவில்லை. ஆகவே மானுடனை மணந்து அனேக துன்பங்களுக்குப் பின் கண்ணனுடன் சேர்ந்தாள். கோதையின் தந்தை பெரியாழ்வார் சிறந்த பக்தர் ஆக இருந்ததால் கோதையின் எண்ணம் நிறைவேற அவர் தடை ஒன்றும் விதிக்கவில்லை.

  

No comments:

Post a Comment