श्रीगणेशशरणाष्टकम्
***************
(१)
कार्त्त्यायनीदेहरजोभिजातं
शिवस्य पुत्रं शिवमावहन्तम्।
स्कन्दानुजं निन्दितसूर्यभासं
तं श्रीगणेशं शरणं प्रपद्ये।।
(२)
रक्तारविन्दोपमपादद्वन्दं
श्वेतारविन्दद्युतिवस्त्रयुक्तम्।
नीलारविन्दैः परिशोभमानं
तं श्रीगणेशं शरणं प्रपद्ये।।
(३)
गजेन्द्रवक्त्रं मदवारिसिक्तं
सिन्दूरलिप्तं रदनेन कान्तम्।
विशालशुण्डं रिपुदर्पदण्डं
तं श्रीगणेशं शरणं प्रपद्ये।।
(४)
खर्वं विनिन्द्यं पृथुलोदरं च
स्थूलस्वरूपं रमणीयरूपम्।
विचित्रगात्रं सुरसाधुसेव्यं
तं श्रीगणेशं शरणं प्रपद्ये।।
(५)
यज्ञोपवीतान्वितदिव्यदेहं
पाशाङ्कुशाब्जाभयदानहस्तम्।
आखौ भ्रमन्तं सततं प्रशान्तं
तं श्रीगणेशं शरणं प्रपद्ये।।
(६)
भालेर्द्धचन्द्रं च ललाटनेत्रं
विघ्नेश्वरं विघ्नविनाशदक्षम्।
भक्तप्रियं भक्तजनातिसेव्यं
तं श्रीगणेशं शरणं प्रपद्ये।।
(७)
सिद्धीश्वरः सिद्धगणाभिवन्द्यो
बुद्धिप्रदो वृद्धिकरो बुधेशः।
समस्तविद्यानिगमादिदाता
तं श्रीगणेशं शरणं प्रपद्ये।।
(८)
यो मङ्गलं मङ्गलकार्यदेवो
माङ्गल्यरूपो बहुमङ्गलाढ्यः।
पूजाग्रपूज्यस्त्रिपुरप्रणम्य
स्तं श्रीगणेशं शरणं प्रपद्ये।।
(रचयिता श्रीव्रजकिशोरः)
No comments:
Post a Comment