Ganesha ashtakam -Sanskrit sloka

Courtesy: Sri.Dr.krishna moorthy 

श्रीगणेशाष्टकम्

भजेम शक्तिबालकं सदा विनायकं विभुं

भजेम शङ्करात्मजं गुहाग्रजं गणेश्वरम् ।

भजेम मूषवाहनं नमेम विघ्ननाशकं

व्रजेम चादिपूजितस्य चाश्रयं मुदावहम् ॥१॥

भजेम हस्तिशीर्षकं नमेम लम्बजाठरं

स्तुवेम सर्पसूत्रिणं मदेभदैत्यमर्दनम् ।

पठेम मुद्गलाख्यकं पुराणकं च सादरं

श्रयेम पार्वतीसुतं कपित्थसारभक्षणम् ॥२॥

भुजेम तत्प्रसादकं वराप्परूपभक्ष्यकं

मधूरुवासिनं परं परात्परं परोद्भवम् ।

ससिद्धिबुद्धिभार्यकं वराङ्कुशप्रधानकं

भजेम पाशधारिणं पुनः पुनर्नमेम तम् ॥३॥

नराकृतिं गजाकृतिं निराकृतिं पराकृतिं

महाकृतिं वराकृतिं श्रयेम सुन्दराकृतिम् ।

महागणेशमादरेण बालरूपिणं प्रभुं

वरैकदन्तमाश्रयेम शुद्धबुद्धिदायकम् ॥४॥

यजेम ब्रह्मणस्पतिं कविं कवीन्द्रपूजितं

हुवेम ज्येष्ठराजकं प्रचण्डपापनाशकम् ।

भजेम शूर्पकर्णकं प्रपञ्चकारणं गुरुं

विसर्गसर्गपालनं श्रयेम चात्मरूपिणम् ॥५॥

गकारपूर्वरूपका ह्यकारमध्यरूपका

तथानुस्वाररूपका च बिन्दुरुत्तरे तथा ।

सुनादसंविधानिका सुसंहिता च सन्धिता 

गणेशविद्यका हि सा स्मरेम तां च सर्वदा ॥६॥

विशेषरक्तवर्णिनं सुरक्तवाससं तथा

सरक्तगन्धलेपनं सुरक्तपुष्पपूजितम् ।

सुभक्तभक्तिवश्यकं प्रमुक्तिशक्तिदायकं

भजेम दूर्वया च तं महाप्रभासुसन्निभम् ॥७॥

अवत्वनन्तरूपकोऽपि सर्वतोऽखिलं जगत्

प्रपञ्चनाशभीषणोऽपि सज्जनान् सुरक्षतु ।

चतुर्थिजातपूजितोऽपि सर्वदाऽपि पातु नो

विशेषदैन्यसंयुतानवत्वशेषपाठकान् ॥८॥

टिप्पणी—

     स्तोत्रमिदं "प्रमाणी" नाम वृत्ते निबद्धमस्ति । उदा— "मुदा करात्तमोदकं सदा विमुक्तिदायकम्"— आदिशङ्करकृता गणेशपञ्चरत्नमालिका । "ल्गिति प्रमाणी ।अध्यायः ५। सूत्रम् ८ ॥ (पिङ्गलाचार्यप्रणीतच्छन्दःशास्त्रम्)"— लकार (। वा लघुः) गकारा (ऽ वा गुरुः) भ्यां यद् वृत्तं समाप्यते तत् 'प्रमाणी ' नाम । 'जरौ लगौ ' इति छन्दोमञ्जरीग्रन्थे । 

उदा— सरोजयोनिरम्बरे रसातले तता च्युतः ।

          तव प्रमाणमीक्षितुं क्षमौ न तौ बभूवतुः ॥

"लहू गुरू णिरंतरा पमाणि अट्ठअक्खरा ।" इति प्राकृत-पिङ्गळ-सूत्रम् २ । ६९ ॥ 

"द्वितुर्यषष्ठमष्टमं गुरुप्रयोजितं यदा ।

 तदा निवेदयन्ति तां बुधा नगस्वरूपिणीम् ॥"  इति श्रुतबोधानुसारेण नगस्वरूपिणीत्यपि नामान्तरम् ॥

(इति हलायुधभट्टकृत-मृतसञ्जीविन्याख्यवृत्त्यादिषु)

"पुनातु भक्तिरच्युता सदाच्युताङ्घ्रिपद्मयोः ।

 श्रुतिस्मृतिप्रमाणिका भवाम्बुराशितारिका ॥" 

 प्रमाणिका जरौ लगौ ॥

(इति शब्दकल्पद्रुमे)

प्रमाणसिद्धे — "प्रमाणिका जरौ लगौ"— वृत्तरत्नाकरोक्ते अष्टाक्षरपादके ॥ (इति वाचस्पत्ये)