atharvaNarahasya -narayana hrudayam

courtesy: sri.bryan Hill         

  नारायणहृदयम्
 आचम्य प्राणानायम्य देशकालौ स्मृत्वा। अस्मद्गुर्वन्तर्गत - श्रीभारतीरमणमुख्यप्राणान्तर्गत - श्रीलक्ष्मीनारायणप्रेरणया श्रीलक्ष्मीनारायणप्रीत्यर्थं ममाभीष्टसिद्ध्यर्थं सङ्कलीकरणरीत्या सम्पुटीकरणरीत्या वा नारायणहृदयस्य सकृदावर्तनं करिष्ये ।
 अस्य श्रीनारायणहृदयस्तोत्रमन्त्रस्य भार्गवर्षये नमः शिरसि । अनुष्टुप् छन्दसे नमः मुखे । श्रीलक्ष्मीनारायणदेवतायै नमः हृदये । ऐं बीजाय नमः गुह्ये । ह्वीं शक्त्यै नमः पादयोः । क्लीं कीलकाय नमः सर्वाङ्गे । श्रीलक्ष्मीनारायणप्रीत्यर्थे जपे विनियोगः ।
 अथ करन्यासः ।
                              ॐ नारायणः परं ज्योतिरित्यङ्गुष्ठाभ्यां नमः ।
                              ॐ नारायणः परं ब्रह्मेति तर्जनीभ्यां नमः ।
                              ॐ नारायणः परो देवेति मध्यमाभ्यां नमः ।
                              ॐ नारायणः परं धामेति अनामिकाभ्यां नमः ।
                              ॐ नारायणः परो धर्मेति कनिष्ठिकाभ्यां नमः           
                                             ॐ नारायणः परो वेदेति करतलकरपृष्ठाभ्याम् नमः ।
       अथ हृदयादि न्यासः -
                                           ॐ नारायणः परं ज्योतिरिति नमः ।
                                           ॐ नारायणः परं ब्रह्मेति शिरसे स्वाहा ।      
                                           ॐ नारायणः परो देवेति शिकायै वषट् ।
                                           ॐ नारायणः परं धामेति कवचाय हुं ।
                                           ॐ नारायणः परो धर्मेति नेत्राभ्यां वौषट्
                                           ॐ नारायणः परो वेदेति अस्त्राय फट् ।
                                           ॐ भूर्भुवस्वरोमिति दिग्बन्धः ।
                                           ॐ भूर्भुवस्वरोमिति दिग्बन्धः ।
 अथ ध्यानम् ।
                        उद्यद्भास्वत्समाभासः चिदानन्दैकदेहवान् ।
                        शङ्खचक्रगदापद्मधरो ध्येयोऽहमीश्वरः ॥१॥
                        लक्ष्मीधराभ्यामाश्लिष्टः स्वमूर्तिगणमध्यगः ।       
                        ब्रह्मवायुशिवाहीशविपैः शक्रादिकैरपि ॥२॥
                        सेव्यमानोऽधिकं भक्त्या नित्यनिश्शेषशक्तिमान् ।    
                        मूर्तयोऽष्टावपि ध्येयाश्चक्रशङ्खवराभयैः ॥३॥
                        उद्यदादित्यसङ्काशं पीतवाससमच्युतम् ।
                        शङ्खचक्रगदापाणिं ध्यायेल्लक्ष्मीपतिं हरिम् ॥४॥
           

                          ॥ ॐ नमो नारायणाय इति मन्त्रजपं कृत्वा ॥
        
                          

                                                      मूलाष्टकम्
                        ॐ नारायणः परं ज्योतिरात्मा नारायणः परः ।
                        नारायणः परं ब्रह्म नारायण नमोऽस्तु ते ॥१॥
                        नारायणः परो देवो धाता नारायणः परः ।
                        नारायण परो ध्याता नारायण नमोऽस्तु ते ॥२॥
                        नारायणः परं धाम ध्यानं नारायणः परः ।
                        नारायणः परो धर्मो नारायण नमोऽस्तु ते ॥३॥
                        नारायणः परो देवो विद्या नारायण परः ।
                        विश्वं नारायणः साक्षान्नारायण नमोऽस्तु ते ॥४॥
                        नारायणद्विधिर्जातो नारायणाच्छिवः ।
                        जातो नारायणादिन्द्रो नारायण नमोऽस्तु ते ॥५॥
                        रविर्नारायणस्तेजश्चान्द्रं नारायणं महः ।
                        वह्निर्नारायणः साक्षान्नारायण नमोऽस्तु ते ॥६॥
                        नारायण उपास्यः स्याद्गुरुर्नारायणः परः ।
                        नारायणः परो बोधो नारायण नमोऽस्तु ते ॥७॥
                        नारायणः फलं मुक्यं सिद्धिर्नारायणः सुखम् ।
                        सेव्यो नारायणः शुद्धो नारायण नमोऽस्तु ते ॥८॥
               

                                       ॥ इति मूलाष्टकम् ॥
 
 

                                                                            प्रार्थनादशकम्

                              नारायणस्त्वमेवासि दहराख्ये हृदि स्थितः ।
                              प्रेरकः प्रेर्यमाणानां त्वया प्रेरितमानसः ॥१॥
                              त्वदाज्ञां शिरसा धृत्वा भजामि जनपावनीम् ।
                              नानोपासनमार्गाणां भवकृद्भावबोधकः ॥२॥
                              भावार्थकृद्भावभूतो भावसौख्यप्रदो भव ।
                              त्वन्मायामोहितं विश्वं त्वयैव परिकल्पितम् ॥३॥
                              त्वदधिष्ठानमात्रेण सैव सर्वार्थकरिणी ।
                              त्वमेव तां पुरस्कृत्य मम कामान्समर्पय ॥४॥
                              न मे त्वदन्यस्त्राताऽस्ति त्वदन्यं नहि दैवतम् ।
                              त्वदन्यं नहि जानामि पालकं पुण्यवर्धनम् ॥५॥
                              यावत् सांसारिको भावो मनस्थो भावनात्मकः ।
                              तावत् सिद्धिर्भवेत् सद्यः सर्वथा सर्वदा विभो ॥६॥
                              पापिनामहमेवाग्र्यो दयालूनां त्वमग्रणीः ।
                              दयनीयो मदन्योऽस्ति तव कोऽत्र जगत्त्रये ॥७॥
                              त्वयाऽप्यहं न सृष्टश्चेन्न स्यात् तव दयालुता ।
                              आमयो नैव सृष्टश्चेदौषधस्य वृथोदयः ॥८॥ 
                              पापसङ्घपरिक्रान्तः पापात्मा पापरूपधृक् ।
                                            त्वदन्यः कोऽत्र पापेभ्यस्त्राता मे जगतीतले ॥९॥
                              त्वमेव माता च पिता त्वमेव त्वमेव बन्धुश्च सखा त्वमेव ।
                              त्वमेव विद्या द्रविणं त्वमेव त्वमेव सर्वं मम देवदेव ॥१०॥
                              प्रार्थानदशकं चैव मूलाष्टकमुदाहृतम् ।
                              यः पठेच्छृणुयान्नित्यं तस्य लक्ष्मीः स्थिरा भवेत् ॥११॥
                              नारायणस्य हृदयं सर्वाभीष्टफलप्रदम् ।
                              लक्ष्मीहृदयकं स्तोत्रं यदि चेत्तद्विना कृतम् ॥१२॥
                              सत्सर्वं निष्फलं प्रोक्तं लक्ष्मीः क्रुध्यति सर्वदा ।
                              एतत् सम्पुटितं स्तोत्रं सर्वकामफलप्रदम् ॥१३॥
                              लक्ष्मीहृदयकं चैव तथा नारायणात्मकम् ।
                              जपेद्यः सम्पुटिकृत्य सर्वाभीष्टमवाप्नुयात् ॥१४॥
                              नारायणस्य हृदयमादौ जप्त्वा ततः परम् ।
                              लक्ष्मीहृदयकं स्तोत्रं जपेन्नारायणं पुनः ॥१५॥
                              पुनर्नारायणं जप्त्वा पुनर्लक्ष्मीकृतं जपेत् ।
                              पुनर्नारायणं जाप्यं सङ्कलीकरणं भवेत् ॥१६॥
                              एवं मध्ये द्विवारेण जपेत्सङ्कलितं हि तत् ।
                              लक्ष्मीहृदयकं स्तोत्रं सर्वकामप्रकाशितम् ॥१७॥
                              तद्वज्जपादिकं कुर्यादेतत् सङ्कलितं शुभम् ।
                              सर्वान्कामानवाप्नोति आधिव्याधिभयं हरेत् ॥१८॥
                              गोप्यमेतत् सदा कुर्यान्न सर्वत्र प्रकाशयेत् ।
                              इति गुह्यतमं शास्त्रमादौ ब्रह्मादिकैः पुरा ॥१९॥
                              तस्मात्सर्वप्रयत्नेन गोपयेत् साधयेत् सुधीः ।
                              यत्रैतत्पुस्तकं तिष्ठेल्लक्ष्मीनारायणात्मकम् ।
                              भूतपैशाचवेतालाः न स्थितास्तत्र सर्वदा ॥२०॥
                              लक्ष्मीहृदयकं प्रोक्तं विधिना साधयेत्सुधीः ।
                              भृगुवारे च रात्रौ च पूजयेत्पुस्तकद्वयम् ॥२१॥
                              सर्वथा सर्वदा सत्यं गोपयेत्साधयेत्सुधीः ।
                              गोपनात् साधनाल्लोके धन्यो भवति तत्त्वतः ॥२२॥
    

                                ॥इत्यथर्वणरहस्ये उत्तरभागे नारायणहृदयम् ॥