Valmiki Ramayana part 41 in Tamil

🍏 ஆதிகாவியம் இராமாயணம்.

🔥 வால்மீகி ராமாயணம் 🔥 - சோ - பாகம்-41.

🍊 அத்தியாயம்-12

   🍅 லக்ஷ்மணனின் சீற்றம் 🍅

🔥 மற்றவர்களுக்குக் கிட்ட முடியாத பராக்கிரமம் உடையவனே! என்று கூறி லக்ஷ்மணனைப் பார்த்து ராமர் பேசத் தொடங்கினார். வில்லாளிகள் அனைவருக்கும் தலைமை தாங்கக் கூடிய திறன் பெற்றவரும், தர்ம விதிகளையெல்லாம் முழுமையாக அறிந்த வருமான அந்த உத்தமர், மேலும் சொன்னார், லக்ஷ்மணா! சொன்னபடியே ஒரு காரியத்தைச் செய்து முடிக்கிற திறமை உனக்குப் பிறவிக் குணமாகவே அமைந்திருக்கிறது. என்னிடத்தில் நீ வைத்திருக்கும் ஈடு இணையற்ற விசுவாசத்தை நான் அறிவேன். உலகப் புகழ் பெற்றவனே! சத்தியம், தர்மத்தின் பாதை ஆகியவற்றின் சூட்சுமத்தைப் பற்றிய மயக்கம் என் தாயாருக்கு ஏற்பட்டிருக்கிறது. ஆகையால் அவருடைய மனத் துயரம் மிகவும் அதிகமாக இருக்கிறது. அறம், பொருள், இன்பம், வீடு- என்கிற நான்கு தர்மங்களுக்குமே ஆதாரமானது அறம் தான். சொன்ன சொல் தவறாமல் இருப்பது என்பதோ, அறங்களில் எல்லாம் மிகச் சிறந்த அறம் எனக் கொண்டாடப் படுகிறது. தந்தை, தாய் ஆச்சார்யன்- ஆகியவர்களின் வார்த்தையை நிறைவேற்றுவதாகச் சொல்லி விட்டு, பிறகு அந்த வார்த்தையைப் பொய் ஆக்குவது என்பது கூடாது. நமது தந்தையின் சொல்படி தான் அன்னை கைகேயி எனக்குக் கட்டளையிட்டார். அந்த வார்த்தையை மீறக் கூடாது. உன்னிடத்தில் உள்ள வீரத்தைப் பெரிதாகக் காட்டிக் கொண்டு பேசுவது என்பது தர்மத்திற்கு ஒவ்வாத காரியம். அந்த அணுகுமுறையை விட்டொழி. தர்மமே எல்லாம் என்பதை மனதில் நிறுத்தி செயல்படு. கொடுமையைக் காட்டுவதாகப்பேசாதே.

🔥 இப்படிக் கூறிய ராமர், தனது தாயார் கௌஸல்யையை நோக்கி மீண்டும் பேசினார். காட்டுக்குப்போக இருக்கிற எனக்கு, நீங்கள் அமைதியான மனதுடன் விடை கொடுக்க வேண்டும். என் உயிரின் மீது ஆணையிட்டு உங்கள் முன் இந்த வேண்டுதலை நான் வைக்கிறேன். எனக்கு நன்மை உண்டாகுமாறு ஆசீர்வதியுங்கள். தந்தையின் வார்த்தையை நிறைவேற்றி விட்டு, நான் வனத்திலிருந்து மீண்டும் உங்களிடம் வந்து சேர்வேன்" உங்கள் துயரம் என்பது இத்துடன் விடப் படட்டும். நீங்கள், அன்னை ஸுமித்திரா தேவியார், நான், லக்ஷ்மணன், ஸீதை எல்லோருமே- தந்தைக்குச் செய்ய வேண்டிய கடமையில் தவறி விடக் கூடாது. துயரத்தை முற்றிலுமாக விடுத்து, கவலையை ஒழித்து, காட்டிலே வாசம் செய்து தந்தையின் வார்த்தையை நான் நிலை நாட்டப்போகிறேன் என்ற மகிழ்ச்சியுடன் என்னை வாழ்த்துங்கள்.

🔥 இப்படிக் கூறிய ராமரைப் பார்த்து கௌஸல்யை, மகனே! நீ எவ்வளவு சொன்னாலும் என்னைப் பரிதவிக்க விட்டு நீ வனம் செல்வதை என்னால் ஏற்க முடியவில்லை. உன் அருகிலேயே இருப்பது தான் என்னுடைய மிகப் பெரிய இன்பம். உன்னைப் பிரிந்து நான் உயிர் வாழ்வதில் ஒரு பயனும் இல்லை" என்று பெரும் துயரத்துடன் கூறினாள். தாயார் இப்படிச் சொன்னதை ராமர் பணிவோடு கேட்டுக் கொண்டு இருந்து விட்டு, லக்ஷ்மணனை ப் பார்த்து மீண்டும் பேசினார். சரியான அணுகுமுறை எது என்று அறிய முடியாமல் தவிக்கும் என் தாயாரோடு சேர்ந்து நீயும் என்னை வருத்தி விடாதே. 

  பொருளைத்தேடுவதிலோ, இன்பத்தை அடைவதிலோ முழுமையான நாட்டம் கொண்ட மனிதன் உலகத்தோரால் இகழப் படுகிறான். ஆனால் அறத்தையே குறிக்கோளாக வைத்து நடப்பவன் எல்லோராலும் போற்றப் படுகிறான். நம் இரு வருக்காயினும் சரி, எனது தாயாருக்காயினும் சரி, கட்டளை இடும் அதிகாரம் உடையவர் தசரத மன்னர். அவருடைய கட்டளை எதுவாயினும் அதை ஏற்று நடக்க வேண்டியவர்கள் நாம். அற்பப் பொருளாகிய இந்த ராஜ்யத்தையே பெரிது என்று எண்ணி, தர்மத்தைக் கைவிட நான் துணிய மாட்டேன். கோபத்தை விடு. மன சஞ்சலத்தை வென்று விடு. மனத் திருப்தியை எய்து, என்னுடைய பட்டாபிஷேகம் என்பது பற்றிய நினைவை அகற்றி விடு!

  🍅 நீ எப்படி நடந்து கொண்டால், நமதுதாயார்களில் ஒருவராகிய கைகேயியின் மனம் திருப்தியுறுமோ அவ்வாறு நடந்து கொள். தன்னுடைய ஆசை நிறைவேறுமோ, நிறைவேறாதோ என்ற மனக் கவலை அவருக்கு இருக்கிறது. இன்னம் ஒரு நிமிடமும் அந்தக் கவலை அவரிடம் தங்கி இருக்கக் கூடாது. அந்தக் காட்சியைக் காண நான் சகிக்க மாட்டேன். உண்மையிலிருந்து தவறாதவரும், சொன்ன சொல்லைக் காப்பாற்றுகிறவரும், யாராலும் தடுக்க முடியாத வீரம் உடையவருமான நமது தந்தையின் சொல் நிறைவேறியே ஆக வேண்டும். தசரத மன்னர் சொல் தவறினார் என்ற பெயர் வந்தால், அவருக்கும் மன வருத்தம் ஏற்படும். அவருடைய மனவருத்தமே என்னைச் சுட்டு எரித்து விடும். மரவுரி உடுத்தி, மான்தோலை அணிந்து, சடைமுடி ஏற்று நான் காட்டுக்குப்போனால் தான், கைகேயியின் மனம் குளிரும். அப்பொழுது தான் அவருக்கு நிம்மதி பிறக்கும். அந்த நிலையை அவருக்கு ஏற்படுத்த நான் கடமைப் பட்டுள்ளேன். இதில் காலதாமதம் கூடாது. உடனடியாக நான் காட்டுக்குப் பயணமாவேன்.

🍒 பட்டாபிஷேகம் நடக்கப்போகிறது என்ற நிலையாகட்டும்- ராஜ்ய பாரம் என்னிடமிருந்து விடுபட்டு பரதனுக்குப்போகிறது என்கிற நிலையாகட்டும்.- எதுவுமே சென்ற ஜென்மத்தில் செய்யப் பட்ட காரியங்களின் பலன் தான். எனக்கு இடர் விளைவிக்கவேண்டும் என்ற எண்ணம் கைகேயிக்குத்தோன்றுவானேன்? இது தெய்வத்தின் செயல் அன்றி வேறு என்ன? பரதனுக்கும், எனக்கும் இடையே எந்த வித்தியாசமும் பாராதவரல்லவோ கைகேயிதேவியார்? அப்படிப் பட்டவர் பட்டாபிஷேகத்தை நிறுத்துகிறார் என்றால், அது தெய்வத்தின் செயல் அன்றிவேறில்லை. இயற்கையிலேயே நல்ல குணம் படைத்த கைகேயி தேவியார் மூர்க்கத் தனமான ஒரு பெண் போல் பேசினார் என்றால், அது தெய்வச் செயல் அன்றிவேறு என்ன? எந்த ஒரு செயலுக்கு க் காரண காரியங்களை நம்மால் அறிந்து சொல்ல முடியவில்லையோ,அந்தச் செயல் தான் தெய்வச் செயல் எனப் படுவது. இது தான் காரணம்- என்று மனதில் ஒரு சமாதானம்ஏற்படுத்தி கொள்வதற்கு வழியே இல்லாத வகையில் ஒரு காரியம் நடக்கும் என்றால், அது தான் தெய்வச் செயல். அதை எதிர்த்துப்போர் செய்யும் வல்லமை உடைய மனிதன் எவனும் இல்லை. எந்த ஒரு இன்பத்திற்கோ, வியாதிக்கோ, கோபத்திற்கோ, துன்பத்திற்கோ- ஏற்கக் கூடிய ஒரு காரணத்தைக் கூற முடியாமல் இருந்தால், அது ஈச்வரனின் செயல். 

🍒இந்திரியங்களையெல்லாம் அடக்கிக் கடும் தவம் செய்யும் முனிவர்கள் கூட, விதி வசத்தால் தாக்கப் பட்டால், தங்கள் நியமங்களையெல்லாம் இழந்து ஆசைக்கும், கோபத்துக்கும் அடிமைப் பட்டுத் தவப் பயனை இழந்து விடுகிறார்கள். இப்படி ஆரம்பிக்கப் பட்ட ஒரு காரியம் தடைப் பட்டு நேர் மாறாக, முடிகிற போது, அது தெய்வச் செயல் அன்றி வேறில்லை. பட்டாபிஷேகம் நிறுத்தப் பட்ட செய்தியை நான் இப்படித் தான் பார்க்கிறேன். இது சாத்திர அறிவின் சாராம்சம். இந்தக்கோணத்தில் இந்த நிகழ்ச்சியை நான் பார்ப்பதால், என் மனதில் இது பற்றி , ஒரு சஞ்சலமும் இல்லை. நீயும் மனச் சஞ்சலத்திற்கு இடம் கொடுக்காமல் , பட்டாபிஷேக நினைப்பை மனதில் இருந்து அகற்றுவாயாக!

🍒 எனது பட்டாபிஷேகத்திற்காகக் கொண்டு வரப் பட்டிருக்கும் உபகரணங்களைக் கொண்டே, என்னுடைய துறவி வாழ்க்கை ஆரம்பித்து வைக்கப் படட்டும். லக்ஷ்மணா! நாட்டை ஆளும் மன்னனின் வாழ்க்கை- காட்டில் வாழும் துறவியின் வாழ்க்கை இவ்விரண்டில் துறவியின் வாழ்க்கையே மேம்பட்டது. இவ்வாறு கூறிய ராமர் முடிவாக லக்ஷ்மணனைப் பார்த்து, " லக்ஷ்மணா! பட்டாபிஷேகம் தடைப் பட்டதற்குக் கைகேயி தேவியார் எந்த விதத்திலும் காரணமாக மாட்டார். அது தெய்வத்தின் செயல் என்பதை அறிவாயாக! என்று கூறினார்.

🍒 ராமர் பேசுவதை த் தலை குனிந்த வண்ணம் பேசாமல் கேட்டுக் கொண்டிருந்த லக்ஷ்மணன், புற்றுக்குள் இருந்து பெரியதொரு பாம்பு சீறுவது போல் சீறினான். அவனுடைய புருவம் நெற்றியில் ஏறியது. கோபம் கொண்ட சிங்கம்போல் அவன் தோற்றமளித்தான். மதம் பிடித்த யானையை ஒத்த தோற்றத்தை அடைந்து விட்ட அவன், ராமரைப் பார்த்து, இந்த நேரத்தில் தர்மத்தைப் பற்றியபேருரையும், உலகோரின் பழிச்சொல் பற்றிய கவலையும், தகுதியற்றவர்கள் தங்கள் காரியத்தை நிறைவேற்றிக் கொள்ள வழி செய்து விடும். க்ஷத்திரிய தர்மத்தைக் கடைப் பிடித்து செயல் படுபவர்களில் சிறந்தவரே! மனோதிடத்தை என்றுமே கைவிடாத நீங்கள், இன்று தெய்வச் செயல் பற்றி இப்படி விளக்கம் அளிப்பது எனக்கு விந்தையாக இருக்கிறது. இப்பொழுது நேரிட்டிருக்கும் தொல்லை, தெய்வச் செயலாகவே இருப்பினும் கூட அது சக்தியற்றது. இது பேராசையால் விளைந்துள்ளது. இதில் குற்றவாளிகளாக உள்ள இருவர், தர்மத்தின் பாதையிலிருந்து மாறி விட்டார்கள் என்று கூட ஏன் நீங்கள் நினைக்க மறுக்கிறீர்கள்? தரமம் தவறாதவரே! அறத்தின் வழியே நின்று செயல்படுபவர்கள் போல, நடிப்பவர்கள் இவ்வுலகில்உள்ளார்கள். வேண்டுமென்றே திட்டமிட்டுத் தான் அவ்விருவரும் உங்களுக்கு வஞ்சகம் செய்யத் துணிந்து விட்டார்கள்- என்ற உண்மை உங்களுக்குப் புலப் படாமல் போவது ஏன்?  

  🔥 இப்படி அவர்கள் இருவரிடையே ஒரு வஞ்சக ஒப்பந்தம் இல்லையென்றால், எப்போதோ கொடுக்கப் பட்டதாகக் கூறப் படுகிற இரண்டு வரங்கள், இத்தனை நாள் கொடுக்கப் படாமலேயே இருப்பது ஏன்? உண்மையிலேயே அப்படி இரண்டு வரங்கள் இருந்திருந்தால், என்றோ அவை அளிக்கப் பட்டிருக்காதா?இன்றைய தினத்திற்காக அந்த வரங்கள் அப்படியே வைக்கப் பட்டிருந்தனவா? உங்களைத் தவிர, வேறு ஒருவனுக்குப் பட்டாபிஷேகம் நடப்பது என்பது மக்கள் வெளுக்கக் கூடியது. என்னால் ஏற்கப் பட முடியாதது.

🍒 உத்தமரே! தந்தை சொல்லைக் காப்பாற்றுவது என்ற பெயரில் நீங்கள் இப்பொழுது ஏற்றுக் கொண்டிருக்கும் அணுகுமுறை, எனக்கு வெறுப்பைத் தருகிறது. கைகேயி அன்னையார் சொன்ன படி ஆடிக் கொண்டிருக்கும் நமது தந்தை, தர்மத்திற்கு விரோதமாகச் செய்ய முனைந்திருக்கிற இந்தக் காரியத்தை, உங்கள் முயற்சியினாலேயே தடுத்து விடும் திறமை படைத்த நீங்கள், அதை நிறைவேற்றி விடத் துடிப்பது ஏன்? 

  🍒உங்களுடைய இந்த தர்மம்உலகின் ஏளனத்திற்குரியது. காரணம் சொல்ல முடியாமல் ஒரு காரியம் நடக்கும் பொழுது, அது தெய்வச் செயல் என்று கூறுகிறீர்கள். அந்த தெய்வச் செயலின் சக்தியையும், அதை எதிர்த்து நிற்கும் ஒரு மனிதனுடைய சக்தியையும், இப்பொழுது மக்கள் நன்றாகவே பார்த்துக் கொள்ளட்டும். பட்டாபிஷேகம் நிறுத்தப் பட்டது தெய்வச் செயல் என்றால், அந்தத் தெய்வச் செயல் என்னுடைய மனித முயற்சியினால் வெல்லப் பட்டது என்பதை மக்கள் இப்பொழுது பார்த்து மகிழட்டும். மத யானையை மனிதன் தன்னுடைய அங்குசத்தினால் அடக்கி விடுவது போல, என்னுடைய முயற்சியால் இந்தப் பட்டாபிஷேகத் தடங்கலை நான் விலக்குகிறேன். உங்களுடைய பட்டாபிஷேகம் நடக்க வேண்டாம் என்று மூவுலக மக்களில் ஒருவனும் சொல்ல மாட்டான். அஷ்டதிக் பாலர்கள் கூற மாட்டார்கள். அப்படியிருக்க, அது வேண்டாம் என்று நீங்கள் இப்பொழுது சொல்வது என்ன? ரகசியமாத் திட்டமிட்டு உங்களுக்கு வனவாசத்தை விதித்தவர்கள் தான், பதினான்கு வருடம் காட்டுக்கு அனுப்பப் பட வேண்டியவர்கள். உங்களுடைய பட்டாபிஷேகத்தை நிறுத்தித் தனது மகனுக்கு முடி சூட்ட வேண்டும் என்ற கைகேயி கொண்டுள்ள ஆசையையும், அதற்கு ஒப்பதல் தந்த நமது தந்தையின் விருப்பத்தையும், இப்பொழுதே நான் ஒட்ட நறுக்குகிறேன். அனைவரிலும் மேம் பட்டவரே!சலிப்பு என்பதை அடையாமல் இப்பொழுது நான் காட்டப்போகிற கொடுமை, தெய்வச் செயலின் கொடுமையைக் காட்டிலும் பன் மடங்கு மேலானது.

 🍁 நீங்கள் காட்டுக்குச் செல்லலாம்- பல்லாயிரம் ஆண்டுகள் ராஜ்ய பாரத்தை நிர்வகித்து நடத்தி விட்டு, அதன் பிறகு உங்களுக்குப் பின் நீங்கள் பெற்றெடுக்கக் கூடிய மகன்களே, இந்த ராஜ்யத்திற்கு உரியவர்களாவார்கள் எதையும் சாதிக்க வல்லவரே. பரிசுத்தம் உடையவரே! ராஜ்யத்தை ஏற்றுக் கொள்ளுங்கள்! பட்டாபிஷேகம் நடக்கட்டும்! எதிர்த்து வருபவர்களை விரட்டி அடிக்க நான் ஒருவன் போதும். எனக்கு இரண்டு கைகள் இருப்பது அழகுக்காக அல்ல. என் கையில் வில் இருப்பது ஒரு ஆபரணமாக அல்ல. என் இடையிலே வாள் தொங்குவது ஒரு தோற்றத்திற்காக அல்ல, என்னுடைய அம்பறாத்தூனியில் இருக்கும் பாணங்கள் கைத்தடிகள் அல்ல! பகைவர்களை அழிப்பதற்காகவே 

  🍒இவையெல்லாம்என்னிடம் இருக்கின்றன. உங்களை எதிர்ப்பவன் தேவேந்திரனே யானாலும், அவனை உயிருடன் தப்பித்துச் செல்ல நான் அனுமதிக்க மாட்டேன். என்னுடைய வாளினால் வெட்டுண்டு, சிதறிக் கிடக்கும் யானைகள், குதிரைகள், போர் வீரர்கள் அவர்களுடைய கைகள், தலைகள், கால்கள்,, இவற்றால் கடப்பதற்குக் கூட இடமில்லாத வகையில் இந்த பூமி நிரப்பப் படப்போகிறது.ஐயனே! தசரத சக்கரவர்த்தியைப் பதவியில் இருந்து விலக்கி, உங்களிடம் ராஜ்யத்தை ஒப்படைக்கும் காரியத்தை நான் செய்து முடிக்கும் போது, என்னுடைய போர்த் திறன் பற்றி உலகமே வியந்து பாராட்டப்போகிறது. சந்தனம் பூசிக் கொள்வதற்கும், தோள் வலைகளை அணிந்து கொள்வதற்கும், தானம் கொடுப்பதற்குமே சில காலமாகப் பயன் பட்டு வந்து விட்ட என்னுடைய கைகள், இப்பொழுது உங்களுடைய பட்டாபிஷேகத்தை நிறுத்துபவர்களைப் பூண்டோடு அழிக்கப் பயன் படப்போகின்றன. உங்கள் கட்டளைக்காகத் தான் காத்திருக்கிறேன். தயவு செய்து கட்டளையிட்டு, எனக்கு அருள் புரியுங்கள்.

 🍒 இவ்வாறு பேசி முடித்த லக்ஷ்மணனின் கண்களில் கண்ணீர் தாரை தாரையாக வடிந்தது. ராமர் அவனுடைய கண்ணீரைத் துடைத்து, அவனைத்தேற்றி, புண்ணியங்கள் பல செய்தவளே! லக்ஷ்மணா! தந்தையின் சொல்லை நிறைவேற்றுவது என்பதில் எல்லா தர்மங்களும் அடங்கி இருக்கிறது என்ற நம்பிக்கை கொண்டவனாக, என்னை முழுமையாக நீ அறிந்து கொள்ள வேண்டும்" என்று அமைதியுடனும் உறுதியுடனும் கூறினார்.

தொடரும் .... 

ஸ்ரீவைஷ்ணவிஸம் முகநூலிலிருந்து எடுத்தது..