Valmiki Ramayana part 21 in Tamil

🌹 ஆதிகாவியம் இராமாயணம் 🌹

🍒 வால்மீகி ராமாயணம் 🍒 - சோ- பாகம்-21

🍁 . அத்தியாயம்-10,

 ⭐ அஹல்யை பெற்ற சாபம் அகன்றது ⭐

🍒 விச்வாமித்திரர், பல ரிஷிகள் ஆகியோரைத் தொடர்ந்து ராமரும், லக்ஷ்மணனும் மிதிலையை அடைந்தவுடன், தொலைவிலிருந்து நகரின் அழகைக் கண்டு, ரிஷிகள் வியந்து பாராட்ட அங்கே இருந்த ஒரு தோட்டத்தில் மனித நடமாட்டம் இல்லாத மிகப் பழைய ஆச்ரமம் ஒன்று அழகுடன் விளங்குவதைக் கண்ட ராமர், அதன் விவரங்களைப் பற்றி விச்வாமித்திரரிடம் கேட்டார்.

🍒 இங்கே ஒரு கடுமையான சாபம் முன்னொரு காலத்தில் பிறந்தது. அதன் விவரத்தைக் கூறுகிறேன் கேள்" என்று தொடங்கி, விச்வாமித்திரர் அந்த ஆச்ரமம் தொடர்பான வரலாற்றை எடுத்துரைக்க ஆரம்பித்தார். 

🍒 தேவர்களாலும் மதிக்கப்பட்ட கௌதம மஹரிஷியின் ஆச்ரமமாகத் தான் இது இருந்தது. இங்கேயே இருந்து கொண்டு பல கடுமையான தவங்களை அவர் மேற் கொண்டார். ஒரு தினம் ஆச்ரமத்தில் கௌதமர் இல்லாத நேரத்தில் இந்திரன், அவரின் உருவத்தை எடுத்துக் கொண்டு, இந்த ஆச்ரமத்திற்கு வந்து, இங்கே இருந்த கௌதமரின் மனைவி அஹல்யையைப் பார்த்து, ஆசை வார்த்தைகளைப் பேசினான். காமத்தால் கவரப்பட்டவர்கள், கால நேரத்தைப் பற்றிக் கவலைப் படுவதற்கில்லை. இப்போதே உன்னுடன் சேர நான் விரும்புகிறேன்" என்று கூறிய அவனை, இந்திரன் என்று அஹல்யை புரிந்து கொண்டு விட்டாள். தன்னுடைய கணவரான கௌதமர் உருவத்தைத் தாங்கி அவன் வந்த போதும், உண்மையில் அவன் யார் என்று புரிந்து கொண்டு விட்ட அஹல்யை தன் மீது இந்திரனே ஆசைப் படுகிறான் என்ற நினைப்பில் பெரும் கர்வம் கொண்டாள். அந்த கர்வத்தினால் ஏற்பட்ட மகிழ்ச்சியில் அவனுக்கு அவள் உடன் பட்டாள். பின்னர் தேவர்களுக்கெல்லாம் அரசனே! என்னையும் காப்பாற்றி, உங்களையும் காத்துக் கொள்ளுங்கள். விரைவில் இங்கிருந்து அகன்று விடுங்கள்" என்று இந்திரனைக் கேட்டுக் கொண்டாள்.

🔥 இந்திரனும் கௌதமரை நினைத்து பயந்தவனாக ஆச்ரமத்தில் இருந்து புறப் பட்டான். ஆனால் தேவர்களாலும் தாங்க முடியாத தவ வலிமையை உடைய கௌதம மஹரிஷி, அக்னியைப்போல் ஜொலித்துக் கொண்டு, மற்றொரு சிவனே போல் அந்த நொடியிலேயே அங்கே தோன்றினார். தன் வேடத்தில் இருந்த, ஆயிரம் கண்ணுடையோன் என்று அழைக்கப் பட்ட இந்திரனைப் பார்த்து நடந்ததை உணர்ந்து, கோபத்தோடு அவர் பேசினார். கெட்ட எண்ணம் உடையவனே! என்னுடைய உருவத்தை எடுத்துக் கொண்டு, யாராலும் செய்யத் தகாத காரியத்தை நீ செய்திருக்கிறாய். ஆகையால் நீ ஆண்மை இழந்தவனாகக் கடவாய்" என்று இந்திரனை அவர் சபித்தார். பிறகு தன் மனைவியைப் பார்த்து, " உண்ண உணவின்றி, காற்றையே உணவாகக் கொண்டு, புழுதியில் புரண்டு, எவர் கண்களுக்கும் தெரியாததோர் பிறவியாக இங்கேயே நெடுங்காலம் விழுந்து கிடப்பாயாக! நடத்தை தவறியவளே! பின்னொரு காலத்தில், தூயவனான ராமர் இந்த இடத்திற்கு வருவார். அப்போது உன் பாவம் நீங்கும். அவரைப் பூஜித்து உன்னுடைய கெட்ட மனம் பரிசுத்தமடையும். அதன் பின்னர் உன்னுடைய பழைய உருவத்தை எய்தி நீ என்னைச் சேருவாய்" என்று சபித்து விட்டு, கௌதமர் இமயமலையை நோக்கிச் சென்றார்.

🔥 இதைக் கூறிய விச்வாமித்திரர் பின்னர், அக்னி முதலிய தேவர்களின் அருளால், இந்திரன் சாபத்தின் கடுமை நீங்கப் பெற்றதையும், விவரித்து விட்டு மேலும் தொடர்ந்தார். ராகவா! புண்ணிய சீலராகிய அந்த கௌதம ரிஷியின் ஆச்ரமம் தான் இது. நீ அதில் நுழைவதால், பெரும் அழகியான அஹல்யை சாபம் நீங்கி, பாவம் விலகி, தன் பழைய உருவை எய்துவாள். வருவாயாக! விச்வாமித்திரரின் சொல்லை ஏற்று ராமர், லக்ஷ்மணன் பின் தொடர, கௌதமரின் ஆச்ரமத்திற்குள் நுழைந்தார். தேவர்கள், அசுரர்கள், மனிதர்கள் .... என்ற எவர் பார்வைக்கும் தெரியாதவளாக அங்கே இருந்த அஹல்யை, ராமர் அங்கே பிரவேசித்ததும் தன் பழைய உருவை அடைந்தாள். அவருக்கு முறையாகப் பூஜைகளைச் செய்தாள். நீண்ட நெடுங்காலமாக மனம் திருந்தி செய்த தவத்தின் காரணமாகவும், ராமரின் தோற்றம் என்ற அருளைப் பெற்ற காரணமாகவும், குற்றம் நீங்கப் பெற்ற அஹல்யையை, அப்போது அங்கே தோன்றிய கௌதமர் ஏற்றார். மன மகிழ்ந்த கௌதம ரிஷியால் முறையாக கௌரவிக்கப் பட்ட ராமர், மிதிலையின் நகர்ப் புறத்திற்குச் செல்லத் தொடங்கினார்.

🔥 ( வால்மீகி ராமாயணத்தில்- கௌதம ரிஷி வேஷமணிந்து வந்த இந்திரனைப் பார்த்த மாத்திரத்திலேயே அஹல்யை அடையாளம் புரிந்து கொண்டு விடுகிறாள். இருந்தும் கூட அவனுடைய ஆசைக்கு இணங்குகிறாள். அது மட்டுமல்ல- அவர்கள் உறவு கொண்ட பின்னர், மன மகிழ்ச்சியோடு தான் அவள் பேசுகிறாள். சீக்கிரம் அந்த இடத்திலிருந்து அகன்று விடுமாறு இந்திரனை எச்சரித்து அனுப்புகிறாள். அதாவது – கற்பு நெறியிலிருந்து முழுமையாக அஹல்யை தவறுகிறாள்)

🔥 கம்ப ராமாயணத்தில்- கௌதம முனிவர் வேடம் பூண்டு வந்தவன் இந்திரன் தான் என்பதை அஹல்யைஈ அவனைப் பார்த்த மாத்திரத்தில் உணரவில்லை, ஆனால் கணவன் என்று நினைத்து அவனோடு உறவு கொண்ட போது, இவன் தன் கணவர் அல்ல" என்ற உணர்வு அவளுக்கு ஏற்பட்டது. ஆனால் அப்போதும் தனக்குத்தகுதி இல்லாத தீச்செயலைப் புரிகிறோம் என்றுஅவள் நிகை்கவில்லை" மாறாக, அந்த இழி செயலுக்கு அவள் மனதறிந்தே உடன் பட்டாள்.

 வால்மீகி ராமாயணத்தின் படி அஹல்யை செய்தது முழுப் பாவம் என்றால், கம்பரின் படி முக்கால் பாவம். அவ்வளவு தான் வித்தியாசம்.

🔥 துளசி தாஸரின் ராமாயணத்தில் இந்த விவரங்கள் எல்லாம் தவிர்க்கப் பட்டிருக்கிறது. அஹல்யை தவறிழைத்து சபிக்கப் பட்டாள் என்ற அளவோடு துளசி தாஸர் நிறுத்திக் கொள்கிறார்.

மேலும் ஒரு விவரத்தையும் பார்ப்போம். கம்ப ராமாயணத்திலும் துளசி தாஸரின் ராமாயணத்திலும் அஹல்யை கல்லாக மாறி விடும் படி சபிக்கப் படுகிறாள். ராமரின் காலடி அவள் மீது பட்டதும் அவள் பாவம் தீர்ந்து, சாபம் நீங்குகிறது. ஆனால் வால்மீகி ராமாயணத்தில் அஹல்யை கல்லாக மாறும் படி சபிக்கப் படவில்லை. யார் கண்ணுக்கும் தெரியாமல் புழுதியோடு புழுதியாக க் கிடக்குமாறு சபிக்கப் படுகிறாள்.

🔥 இந்த இடத்தில் ஒரு விஷயத்தை விளக்கி விடுவது நல்லது என்று நினைக்கிறேன். வட பகுதிகளில் வழங்கும் வால்மீகி ராமாயண பதிப்புகளிலிருந்து, தென் பகுதிகளில் வழங்கும் வால்மீகி ராமாயண பதிப்புகள் சில இடங்களில் மாறுபடுகின்றன. அவற்றில் இந்தக் கட்டமும் ஒன்று. நான் இந்தத் தொடரில் வட பகுதிகளில் வழங்கும் பதிப்பையே ஆதாரமாக எடுத்துக் கொண்டிருக்கிறேன்.

🔥 உண்ண உணவின்றி, காற்றையே உணவாக உட்கொண்டு என்று தான் வட பகுதி பதிப்புகளில், கௌதமரின் சாபம் தொடங்குகிறது. ஆனால் தென்னக பதிப்புகளில் " கல்லாக மாறி காற்றையே உணவாகக் கொண்டு" என்று அந்த சாபம் தொடங்குகிறது. ஆனால் பிந்தைய ஸ்லோகங்கள் இரண்டு பதிப்புகளிலும் ஒரே மாதிரியாகத் தான் இருக்கின்றன. அதாவது " யார் கண்ணுக்கும் புலப் படாமல்" புழுதியிலே கிடந்து.... என்பது வட பதிப்பு போவவே, தென் பதிப்பிலும் வருகிறது. ஆகையால், " கல்லாய் மாறி" என்பதைவிட, " உண்ண உணவின்றி" என்பதே பொருத்தமாக இருக்கிறது என்று பல பண்டிதர்கள் சுட்டிக் காட்டியிருக்கிறார்கள்.

🔥 வால்மீகி ராமாயணத்தில் கௌதமரின் சாபத்தினால் ஆண்மையை இழக்கிற இந்திரன், பிறகு தேவதைகளின் அருளினால் அதற்கோர் பரிகாரத்தைப் பெறுகிறான். ஒரு வேள்விக்கான ஆட்டின் உறுப்புகளைக் கொண்டு, இழந்த ஆண்மையை அவன் மீண்டும் பெறுகிறான். கம்ப ராமாயணத்தில் இந்திரனுக்கு கௌதமர் இட்ட சாபம் வேறு விதமாகக் கூறப் படுகிறது. " ஆயிரம் மாதர்க்கு உள்ள அறிகுறி உனக்கு உண்டாக,... என்று இந்திரனை கௌதமர் சபித்து விடுகிறார்.

🔥 இந்த வேறு பாடுகள் ஒரு புறமிருக்க, அடிப்படையாகவே ஒரு கேள்வி பலர் மனதிலும் எழக் கூடும்.- தெரிந்தே கணவனுக்கு துரோகம் செய்த அஹல்யை மன்னிப்பைப் பெறுவது, முறையானது தானா? என்ற தர்ம சங்கடமான இந்த விஷயத்திற்கு, ஒரே ஒரு சமாதானத்தைத் தான் கூற முடியும் என்று நான் நினைக்கிறேன். செய்த தவறுக்கு மிகக் கடுமையான தண்டனை அனுபவித்ததோடு அல்லாமல், யாராலும் காண முடியாத நிலையில் கூட, அஹல்யை கடும் தவம் புரிந்தாள் என்பது கூறப் பட்டிருக்கிறது. இதையெல்லாம் விட மேலாக, அவளுக்கு ராமருடைய அருள் கிட்டுகிறது. அதனால் அவளுடைய பாவம் நீங்குகிறது. அஹல்யையின் தவறு கடுமையானது தான். ஆனால் அப்படிப் பட்ட தவறிழைத்தும் கூட, மனம் திருந்திய ஒருவரை மீட்கக் கூடிய வல்லமை, ராமரின் அருளுக்கு உண்டு. இந்த வகையில் தான் இதைப் புரிந்து கொள்ள வேண்டும் என்று நான் கருதுகிறேன்)

தொடரும்…

⚡ஶ்ரீராமஜெயம்ஶ்ரீராமஜெயம்ஶ்ரீராமஜெயம்

ஸ்ரீவைஷ்ணவிஸம் முகநூலிலிருந்து எடுத்தது.